Ресейлік алаяқтар елімізде қаржы пирамидасын құрып, қазақстандықтарды тонап жүргені рас па?

SmartNews сайтының хабарлауынша, тергеу органдарымен Т. аса ірі мөлшерде ақша тарта отырып, қаржылық пирамиданы құрып және оған басшылық жасағаны үшін айыпталды (ҚК-тің 217-бабының 3-бөлігінің 2-тармағы).

Атырау облыстық сотының хабарлауынша, сотталушы Т. Ресей Федерациясының азаматы Д.-ның  «Thefiniko» компаниясын құрғанын біліп, адамдар тобымен алдын ала сөз байласып, оған қосылуға және компания атынан әрекет жасауға шешім қабылдаған.

Т. Қазақстан Республикасы аумағында «Thefiniko» компаниясының тұрақты табыс алатынына, яғни халықпен жұмыс істеу тәжірибесі бар екеніне көз жеткізіп, компанияның құрылымдық бөлімшесін басқаруға шешім қабылдаған.

Ол компанияға 19 жәбірленушіні тартып, жалпы келтірілген залал сомасы 108 млн теңгеден астам соманы құраған, оның ішінде ол тергеу сатысында 93 млн теңге залалдың орнын толтырған (өтелмеген залал сомасы – шамамен 15 млн теңге).

Сотталушының кінәсі жәбірленушілердің, куәлардың айғақтарымен, экономикалық сараптама қорытындысымен, маман қорытындысымен, фото және бейнематериалдармен толықтай өз дәлелін тапты.

Прокурор сотталушыға 6 жыл мерзімге бас бостандығынан айыру жазасын тағайындауды сұрады.

"Сот үкімімен Т. кінәлі деп танылып, оған қаржылық, коммерциялық және коммерциялық емес ұйымдарда басшылық лауазымдарды атқару құқығынан 7 жыл мерзімге айыра отырып, 5 жыл мерзімге бас бостандығынан айыру жазасы тағайындалды.

Оның зейнеткерлік жасын және келтірілген залалдың ішінара өтелгенін ескеріп, сот ҚК-тің 63-бабын қолданып, жазаны шартты түрде тағайындады.

Сот үкімі заңды күшіне енген жоқ", - делінген соттың хабарламасында.