"Шымкентте ондай бар": әнші Айдар Тұрғамбек сыңсу айтатыны рас па?

Smart News басылымының хабарлауынша, "Айналайын" бағдарламасына барған "Жігіттер" тобының мүшесі Айдар Тұрғамбек көпшілікті мазалаған сұрақтарға жауап берді.

Тележүргізушінің "Сыңсу айтып, қызды шығарып салатыныңызды көрдік. Өзіңіз айтыңыз, қалай басталды?" деген сұраққа әнші өз жауабын берді.

"Сыңсу деген қыздың өзінің айтатыны ғой, ұзатылып бара жатқанындағы әні. Бізде оңтүстікте кеңінен тараған дүние сыңсу. 

Бұрындары негізі той деген болмаған ғой. Қызды үйінен шығарып салатын болған. Сонда ағасы қарындасына арнаған әні болатын. Бізде әлі бар. 

"Ашқан жұмыртқадай аппақ көркің, өзіңдей қарындасты қайдан табам?!" деген ескі әндерді ағалар қарындастарына арнаған", - деді әнші.

Сондай-ақ әнші Айдар Тұрғамбек қызды әнмен шығарып салуды дәстүрге айналдырған Жазира Байырбекова бастағанын айта кетті.

"Беріде қыздарды алғаш шығарып бастаған Жазира болды. Бәрін Жазира бастады. Жазира "маған солай шық деп айтты, содан қызды қолынан ұстап шығару дәстүр сияқты қалып қойды" деді. 

Шымкентте әкенің қызына, ағаның қарындасына арнаған әндері болушы еді. Бірақ қыздың қызға арнаған әні жоқ еді", - деді әнші.

"Сізге осы үшін қарсылықтар, сын-ескертпелер болды ма?" деген сұраққа Айдар Тұрғамбек әлеуметтік желіде сын астында қалғанын еске алды.

"Иә, ескертпелер болды. Бірақ мен онсыз да сол тойға ән айтуға барсам, әнмен қызды шығарып салсам да болады ғой. Мен қызды қолынан ұстап шығарып салып жатқан жоқпын. Тек ағалық ниетпен, "Тілек" деген әнімді сахнада айтып тұрамын, ал қызды жеңгелері ұстап шығарып салады" - дейді Айдар Тұрғамбек.