RUS
Smart News басылымының хабарлауынша, Қобда аудандық сотында балаларын күтіп-бағуға арналған қаражатты төлеу жөніндегі міндеттерді орындамағаны үшін сотқа берілген (ҚК 139-бабы) А.-ға қатысты үкім жарияланды.
Қобда аудандық сотының баспасөз қызметінің дерегінше, сотталушы 2014 жылы заңды некеге тұрған. 2015 жылы неке заңды түрде бұзылып, кәмелетке толмаған екі баласы анасының тәрбиесінде қалған. Соттың бұйрығымен алимент өндірілгенмен, алимент төлеу жөніндегі міндеттерін сотталушы орындамаған. Осылайша ол 2022 жылы соттың қаулысымен әкімшілік жауапкершілікке тартылған.
Алайда, әкімшілік жауапкершілікке тартылса да, алимент төлеуден қашып, жұмысы мен табыс көзі туралы мәліметтерді сот орындаушысына хабарламаған.
Балаларына материалдық көмек көрсетпеген сотталушының алимент бойынша қарызы 4 миллион теңгеден асқан.
Сот отырысында сотталушы А. өз кінәсін мойындап, өкінетінін, алдағы уақытта балаларын күтіп-бағуға алимент төлейтінін көрсетті. Ал балалардың анасы сот отырысында 2019 жылдан бері сотталушы алимент төлемегенін, қазіргі таңда оны кешіретінін көрсетті. Азаматтық талап қойылмаған.
Сотталушының кінәсі өз мойындауымен қатар, куәлардың жауаптарымен және басқа да айғақтармен өз дәлелін тапты.
"Қылмыстық кодекстің 139-бабының санкциясы алты жүз сағатқа дейінгі мерзімге қоғамдық жұмыстарға тартуға не екі жылға дейінгі мерзімге бас бостандығын шектеуге не сол мерзімге бас бостандығынан айыруға жазасын көздейді.
Соттың үкімімен сотталушы кінәлі деп танылып, оған 1 жыл мерзімге бас бостандығынан шектеу жазасы тағайындалды. Сотталғанға пробациялық бақылау белгіленіп, мәжбүрлі еңбекке тартылды.
Бас бостандығынан шектеу жазасын өтеуден жалтарған жағдайда, бас бостандығынан айыру жазасымен ауыстырылатыны түсіндірілді.
Үкім заңды күшіне енген жоқ", - делінген сот хабарламасында.