SmartNews басылымының хабарлауынша, 2020 жылы ҚР Тұңғыш Президентінің 80 жылдығына орай тұрғызылған ескерткіш алынып тасталды. Бұл туралы бірқатар басылымдар жазған болатын.
Желіде Ұлттық қорғаныс университетінің аумағында Нұрсұлтан Назарбаев ескерткіші бөлшектелгені туралы ақпарат пайда болды. Orda.kz тілшісіне басшылық қазір ескерткіш жоқ екенін растағанмен, егжей-тегжейін жариялаудан бас тартқан.
Ал Қорғаныс министрлігі ескерткішті бұзу туралы түсініктеме берді:
"Қорғаныс министрінің бұйрығымен "ҚР Тұңғыш Президенті-Елбасы атындағы Ұлттық қорғаныс университетінің" атауы "ҚР Ұлттық қорғаныс университеті" болып өзгертілді. Осыған байланысты Ұлттық қорғаныс университетінің аумағында орналасқан ескерткішті ҚР Қарулы Күштерінің мемлекеттік әскери-тарихи мұражайының ғимаратына көшіру және орнату туралы шешім қабылданды.
Қазіргі уақытта ескерткіш қорғаныс ведомствосының ғимаратында уақытша сақтаулы тұр. Дайындық іс-шаралары өткізілгеннен кейін ескерткіш орнату үшін мұражай ғимаратына көшіріледі", деп қосты министрлік.
Естеріңізге сала кетейік, Сенат депутаттары "Елбасы" сөзін Ұлттық қорғаныс университетінің атауынан алып тастауға шешім қабылдады. Жоғары оқу орнының атауы ҚР Тұңғыш Президенті туралы Заңның қолданылуының тоқтатылуына байланысты өзгертіледі.