RUS
Жобаның мақсаты – оқу орнының оқытушы-профессорлар құрамы мен әкімшілік қызметкерлерінің ғылым, академиялық жұмыс, халықаралық байланыстар және т.б. бойынша білімдері мен біліктіліктерін арттыру, ұжым арасындағы ынтымақтастық пен әріптестік байланыстарды нығайту.
Қысқы мектеп барысында Халықаралық байланыстар және қаржылық сауаттылық, сапаны ішкі қамтамасыз ету, стратегиялық басқару және менеджмент, ғылым және академиялық менеджмент апталықтары ұйымдастырылды.
Әр апталық тақырыбына сай семинар-тренингтер өткізілді. Университеттің оқытушы-профессорлар құрамы мен әкімшілік қызметкерлері Түркия университеттерінің академиялық ұтқырлық бағдарламаларымен танысып, Болон процессімен жұмыс істеудің қыр-сырын үйренді және қаржылық сауаттылық түсінігі және оның маңыздылығын терең түсінді. Ғылыми-зерттеу жобасын жазудың түрлі әдіс-тәсілдерін талқылап, өзара тәжірибе алмасты. Коммерцияландыру жобаларын әзірлеу және басқару жолдарымен танысты. Халықаралық стандарттарға сәйкес жобаларды жоспарлау, бастау, жүргізу, бақылау және аяқтау принциптері мен әдістері туралы білім мен дағдылардың қажетті деңгейін меңгерді. Сондай-ақ, өзге де маңызды тақырыптар бойынша біліктілігін арттырды. Қысқы мектептің қорытындысы – республика көлемінде ұйымдастырылған «Педагогикалық білім беру моделін іске асыру және оның мазмұнын күшейту» жобасы болды.
Білім беруді жаңғырту жағдайында педагогикалық құзыреттілік салаларын арттыру және оқу бағдарламаларын (силлабустар) әзірлеу арқылы кәсіби құзыреттіліктерді терең түсіндіруді мақсат еткен айтулы жобаға университеттің 187 оқытушы-профессоры қатысты.
Айта кетерлігі, қысқы мектеп апталықтарына тәжірибелі спикерлер арнайы шақырылды. Нақтырақ, ҚР Ұлттық ғылым академиясынан делегация келіп, ғалымдармен еліміздің ғылыми әлеуетін арттыруға бағытталған бірнеше мәселе талқыланды. Сондай-ақ, ҚР Парламенті Сенатының депутаты, Халықаралық қатынастар, қорғаныс және қауіпсіздік комитетінің хатшысы Дархан Қыдырәлі де қысқы мектепте арнайы қонақ болды. Бұдан өзге де халықаралық және отандық сарапшылар өз тәжірибесімен бөлісті.
Ахмет Ясауи университетінің ректоры Жанар Темірбекова:
«Қысқы мектебімізге жан-жақтан жақсы қолдау көрсетіліп жатыр. Сырттан маңызды тұлғалар да қатысуда. Маңызды бастамалар көтерілген бұл шараның өзектілігі жоғары. Қазіргі заманда бірқатар құзіреттіліктерді үйренбесек, алға жылжи алмаймыз. Қысқы мектепті ұйымдастырудағы мақсатымыз да әріптестеріміздің түрлі саладағы біліктілігін арттырып, бәсекеге қабілетті болуына көмектесу болды», - дейді.