RUS
«Азаматтарға арналған үкімет» мемлекеттік корпорациясы Алматы қаласы филиалының мәліметінше, Алматыда Жандосов көшесі, 51 мекенжайында орналасқан Әуезов аудандық ХҚО ғимаратында онлайн форматта рәсімделген дайын құжаттарды беру секторы жұмыс істей бастады. Мұнда “көлік құралдарын тіркеу” және “жүргізуші куәліктері” бойынша дайын құжаттарды алуға болады.
«Қала тұрғындары онлайн рәсімдеген құжаттарын алысқа бармай, қала орталығынан алу үшін арнайы сектор аштық. Мұнда көлік құралдарына қатысты онлайн рәсімделген құжаттардың дайын нұсқасын алады. Осылайша, көлік иелері уақытын үнемдейді. Қала тұрғындары оның қолайлылығын сезініп те жатыр. Бір ай ішінде мұнда 1787 құжат берілді. Оның 771-і көлік құралын мемлекеттік тіркеу бойынша, 1016-сы жүргізуші куәліктері», - деді «Азаматтарға арналған үкімет» мемлекеттік корпорациясы Алматы қаласы филиалы директорының орынбасары Айнаш Аубакирова.
Дайын құжаттарды беру секторы дүйсенбі мен жұма аралығында таңғы 9:00-ден 18:00-ге дейін үзіліссіз жұмыс істейді.
Айта кетейік, Алматыда сондай-ақ "AllurAuto", "Hyundai", "Mycar" "Aster auto" "Chanqan» сияқты 9 автосалонда АвтоХҚО мамандары көлік құралдарын мемлекеттік тіркеу бойынша құжаттарды қабылдап отыр.
Еске салайық, Алматыда автокөлік иелеріне арналған 4 Мамандандырылған ХҚО жұмыс істейді. Олар:
№ 1 мамандандырылған ХҚО - Алатау ауданы, Саялы шағынауданы, Аққайнар көшесі, 1
№ 2 мамандандырылған ХҚО - Түрксіб ауданы, Б. Майлин көшесі, 240а
№ 5 мамандандырылған ХҚО, Түрксіб ауданы, Қайрат шағынауданы, Құлжа тас жолы, 9 к
№ 6 мамандандырылған ХҚО - Жетісу ауданы, Кемел шағын ауданы, Ақсуат көшесі, 118.
“Өткен жылы Алматы қаласының Мамандандырылған халыққа қызмет көрсету бөлімдері арқылы 1,3 (1 280 252) миллионға жуық мемлекеттік қызмет көрсетілді”, - деп хабарлады «Азаматтарға арналған үкімет» мемлекеттік корпорациясы Алматы қаласы филиалының баспасөз қызметі.