RUS
SMARTNEWS басылымының хабарлауынша, Алматы музейінде 2024 жылғы 12 ақпанда сағат 16.00-де белгілі журналист, қоғам қайраткері, тележүргізуші Бейсен Құранбектің өмірі мен шығармашылығына арналған «Бейсен. Биік болмыс» атты көрменің ашылуы өтпек.
ҚР Мәдениет қайраткері, Қазақстан журналистер одағы сыйлығының иегері, Талдықорған қаласының құрметті азаматы, халқымыздың біртуар перзенті Бейсен Құранбек 1971 жылы 9 желтоқсанда Алматы облысы Кербұлақ ауданы Қызылжар ауылында дүниеге келген. Әл-Фараби атындағы Қазақ ұлттық университетінің түлегі. Еңбек жолын республикалық «Спорт» газетінде тілші, жауапты хатшы қызметтерінен бастаған.
Бейсен Құранбектің шығармашылық өмірі Алматы қаласымен тығыз байланысты. Осында оқып, осында еңбек жолын бастаған Бейсен өзінің шығармашылығының айқын, жарқын парақтары – қазақтың мұңын мұңдап, жоғын жоқтауға арналған «Айтуға оңай» мен «Қарекет» бағдарламаларын Алматы қаласында дайындап, Алматы қаласында түсіріп, елге таратты.
Көрмеде журналистің фотосуреттері, құжаттары мен марапаттары, киімдері, жеке заттары, қолжазбалары және спортта жеткен жетістіктері кубок, дипломдары т.б. ұсынылады.
Көрменің ашылуына қазақ телевизиясының майталмандары, танымал журналистің әріптестері мен шәкірттері қатыспақ.