Жетімдер үйінің тәрбиеленушісі тұрғын үй кезегіне байланысты Қарағанды әкімін сотқа берді
Cотталушылар бір ай ішінде барлық заң бұзушылықтарды жоюға міндеттелді.
SMARTNEWS басылымының хабарлауынша, Қарағанды соты қала әкімі мен тұрғын үй қатынастары бөліміне қатысты талап арызды қарады. Бұл туралы облыстық сот жазды.
Балалар үйінің тәрбиеленушісі болған Т мемлекеттік тұрғын үй қорынан тұрғын үй алу кезегіндегі санатын өзгертуді сұраған. Ол 2014 жылдың 8 шілдесінен бастап "Толық емес отбасы" санаты бойынша кезекте тұр. Тұрғын үй қатынастары бөлімі оның Теміртау қаласындағы балалар үйінің түлегі екенін және "Жетім және ата-анасының қамқорлығынсыз қалған балалар" санаты бойынша есепке алынғанын ескермеген.
03.05.2023 жылы Т санатты өзгерту туралы өтінішпен департаментке жүгінген. 2023 жылдың 26 мамырында департамент өтінішті қанағаттандырудан бас тартты.
Сот отырысында әкімдік өкілдері талапкердің құжаттарында балалар үйі туралы мәліметтердің болмағанын айтты. Олар жетім баланың 2014 жылдың 8 шілдесінен бері "Толық емес отбасы" санаты бойынша кезекте тұрғандықтан құқығы бұзылмағанын айтты.
"Сотта анықталғандай, талапкер 2003 жылдың 12 ақпанынан 2007 жылдың 7 қыркүйегіне дейін интернатта тәрбиеленіп, мемлекет тарапынан толық қамтамасыз етілген. Әкімдіктің тиісті санат бойынша уақытылы тіркеу жүргізбеуі, азаматтың құқықтары мен заңды мүдделерінің бұзылуына әкеп соқты”, – деп хабарлады Қарағанды облысының соты.
Cотталушылар бір ай ішінде барлық заң бұзушылықтарды жоюға міндеттелді.
Материал авторы
