RUS
SMARTNEWS басылымының хабарлауынша, «Нысана» әзіл-сықақ театрының актері, әзілкеш Жарас Ахметов өзінің өміріндегі қиын сәттерді айтты. Ол «Нұрлы жан» YouTube-арнасына берген сұхбатында өзінің әкесі із-түссіз жоғалып кеткенін, әлі күнге дейін таппай жүргенін айтты.
«Анам, келіншегім, бес балам, бәріміз бірге тұрамыз. Төрт қыз, бір ұл тәрбиелеп отырмыз. 2007-жылы әкем жоғалып кетті. Қарындасымның үйіне барып, «Барлықтарыңа ризамын» деп бір-ақ ауыз сөз жазған. Соны әлі күнге дейін түсінбеймін. Бұл жағдайды тек ең жақын, жанашыр адамдарымыз ғана білетін. Еш жерге жариялап айтпағам.
Бір жарым жыл іздедім. Қазақстан бойынша, қай жерден қандай сыбыс шығады, сол жерлердің бәріне бардым. Төрт ай БИЧ-тердің қасында жүрдім. Үйсіз-күйсіз жүрген кісілерге әкемнің суретін көрсетіп, олар бірдеңе айту үшін ас-суын әперіп, барлық жерді шарладым. Дерек шықпады», - дейді актер.
Сондай-ақ актер халықтың әкесін тауып беруге көмектескенін қалайды. Ол сұхбат барысында әкесіне сәлем де жолдады.
«Әлі де үмітімізді үзбейміз. Осы сұхбатты көріп, бірақ қайтып келуге ұялып отырса... бәрін кешіреміз. Табылып қалса нұр үстіне нұр болар еді.
Әкенің орны бөлек. Мені таксист боп жүріп оқытқан. Өнерге барғанымды қатты қалап, Жүргенов атындағы өнер академиясына ертіп апарған еді. Әкемнен бір ұл, бір қызбыз. Сағынамыз, іздейміз. Әкемнің аты – Ахметов Кәміл Болатұлы. Көрген-білген адам болса, хабар берсеңіздер», - дейді Жарас Ахметов.