SMARTNEWS басылымының хабарлауынша, Қазақстандық шоу-бизнес жұлдызы Жазира Байырбекова мейрамханаларға ат кіргізіп, той жасайтындарды сынға алды. Өнер иесінің айтуынша, жануарды қинап кіргізген сәтті көру өзіне аса ауыр тиеді.
Жазира Байырбекова соңғы кезде тұсаукесер мен сүндет тойлар жылқысыз өтпейтініне қынжылды. Ол Instagram парақшасында көпшілікке үндеу жасап, той иелеріне жануарларды қинамауға шақырды.
«Қаладағы 2 қабатты мейрамханаларға көтеріліп жүретін аттарға қарағанда, мына аттар бақыттырақ. Кеше Хамит досым ұлдарының сүндет тойында аттарды мейрамханаға кіргізбей, атпен жүретін рәсімді сыртта жасады. Жарайсың! Оңтүстікте сүндет той жасаса аттарды үлкен баспалдақтарға қинап мінгізіп, мейрамханаға кіргізіп жатқандарды көріп аттарға жаным ашығаны-ай», - деп жазды әнші.
Әншінің оқырмандары да оның пікіріне қостасып кетті.
«Атты қойып енді түйе кіргізіп жатыр», «Тойынғандық қой, еріккендік. Қалай халыққа әдемі көрінсек екен деп жануарды қинайды», «Оларға мақтаныш. Ат кіргізу, түйе кіргізу еш мәдениет жоқ нәрселер», «Жылқының ресторанға кіруін тек Шымкент жақтағылардан көрдік. Понт үшін киелі жануарды қинап, мақтаншақтық. Бір үлкен кісі айтпай ма, мыналарың енді артық деп, түсінбеймін», деп жазды оқырмандар.