RUS
Кездесу министр С. Нұрбектің 2024 жылғы 1-2 сәуірде Оңтүстік Кореяға жұмыс сапары аясында өтті.
Тараптар екі елдің ғылым және цифрлық технологиялар саласындағы ынтымақтастығын талқылады. С.Нұрбек әріптесіне Қазақстандағы жоғары білім мен ғылым саласындағы реформалар туралы айтып берді. Атап айтқанда, Мемлекет басшысы Қ.Тоқаев Қазақстанда жасанды интеллектті зерттейтін 3 мектеп ашуды тапсырып, Қазақстанда KAIST шетелдік филиалын ашу бастамасын қолдауды ұсынды.
«Ғылым және жоғары білім министрлігі Мемлекет басшысының тағылымдамадан өту үшін жыл сайын әлемнің жетекші жоғары оқу орындары мен ҒЗИ-ға 500 ғалымды жіберу жөніндегі тапсырмасын орындау бойынша белсенді жұмыс жүргізуде. Инженерлік-техникалық кадрларды даярлауға және қайта даярлауға ерекше назар аударылады, осыған байланысты «Болашақ» бағдарламалары мен «500 ғалым» ғылыми тағылымдамалары бойынша елдеріміз арасындағы ынтымақтастықты кеңейту аса маңызды рөл атқарады. Өздеріңіз білетіндей, Оңтүстік Корея осы бағыт бойынша озық нәтижелерге қол жеткізді», – деді С.Нұрбек.
Сондай-ақ, Ғылым және жоғары білім министрі С.Нұрбек KAIST-тің Қазақстандағы шетелдік филиалын ашу мүмкіндігін қарастыруды ұсынды. Ли Чжон Хо мырза Қазақстанда филиал ашуға толық көмек көрсетуге уәде берді.
Өз кезегінде Ғылым және ақпараттық-коммуникациялық технологиялар министрі Ли Чжон Хо мырза K-cloud project жобасын іске асыру туралы айтып берді, сондай-ақ ғылымда үздік нәтижелерге қол жеткізу үшін Қазақстан мен Кореяның стипендиялық бағдарламаларының күш-жігерін біріктіруді ұсынды.Кездесу қорытындысы бойынша тараптар екі ел арасындағы ғылымды дамыту бойынша өзара түсіністік туралы Меморандумға қол қою мүмкіндігін талқылады.
Анықтама: KAIST университеті әлемде және жаһандық академиялық қоғамдастықта электротехника, информатика, машина жасау және инженерия салаларындағы инновациялық зерттеулері мен әзірлемелерімен кеңінен танымал. Ол Азия-Тынық мұхиты аймағындағы ең инновациялық университет ретінде танылды, сонымен қатар Times Higher Education журналының мәліметі бойынша 50 жасқа толмаған әлемдегі ең үздік университеттер рейтингінде үшінші орында.