RUS
SMARTNEWS.KZ басылымының хабарлауынша, Атырау облысында соңғы төрт жылда сегіз жүзге жуық жүкті жасөспірім қыз анықталған. Бұл туралы Almaty.tv жазды.
Телеарнаның мәліметінше, өткен жылы 127 оқушы қыз тіркелген. Олардың жартысы босанса, 45-і түрлі себептермен түсік жасатқан.
Қорқынышты статистиканың шыңы 2021 жылы болған. Ол кезде 200-ге жуық кәмелетке толмағандар жүкті боп қалған.
«Жасөспірім қыздар көбінесе ата-анасынан қорыққандықтан түсік жасатуға барады. Ал бұл көптеген зардаптарға әкеледі. Біріншіден, әйелдің ұрпақты болу органдарында: жатырда, түтіктерде және аналық бездерде қабыну үрдісі пайда болады. Екіншіден, ол бедеулікке әкелуі мүмкін», - дейді акушер-гинеколог Әйгерім Қайратқызы.
Физикалық бұзылулардан басқа, жас аналарда психикалық бұзылулар да болуы мүмкін. Жасөспірім өзінің жағдайына байланысты қоғамға бейімделе алмайды. Моральдық және материалдық қиындықтар үлкен әсер етеді.
«Қыз бала әкесіз өссе, яғни әке махаббаты жетіспесе ол осы жылуды басқа адамдардан, еркектерден іздейді. Үлкендер алдау арқылы қалағанына қол жеткізеді, ал қыз бұл жағдайда жалғыз қалады» – деп атап өтті психолог Гүлвира Нұрсұлтанқызы.
Жалпы облыс бойынша жеті жарым мыңнан астам әйел жүкті. Олардың арасында өте жас аналар да бар. Жасөспірімдердің жүкті болу жағдайлары Жылыой ауданы мен Атырауда жиі тіркеледі.