Атыраулық жедел жәрдемшілер келіншекті үйде босандырып, егіздердің өмірін аман алып қалды

SMARTNEWS.KZ басылымының хабарлауынша, Жаңа жыл қарсаңында атыраулық әйел егіз қыздарын үйде босанған.

Ана мен сәбилердің өмірін жас фельдшерлер Эльвира Кәрімова мен Қанат Жексембаев аман сақтап қалған көрінеді. Оқиға кеше, 29 желтоқсан күні болған. Сол күні қыздардың анасы толғақ қысқан соң үйіне жедел жәрдем шақырған. Келіншектің үйіне дереу жеткен №9 бригада әйелдің туу уақыты жеткенін, перзентханаға жеткізу қауіпті боларына көздері жеткен.

Эльвира Кәрімованың айтуынша, әріптесі екеуі перзентханаға жеткенше үлгермейтіндерін біліп, еш саспастан әйелді босандыруға кіріскен.

Сурет: atpress.kz / Эльвира Кәрімова

«Біз барған уақытта, баланың басы шығып келе жатты. Мен босандыруға кірісіп кеттім. Бірінші қыз өмірге келіп, кіндігін кесіп жатқанда, келіншек ол егіз екенін айтты. Бастапқыда сасып қалдым. 11 жылдық тәжірибемде мұндай оқиға алғаш рет боп тұр. Бұған дейін қаншама әйелді босандырып алсам да, егіздердің өмірге келуіне алғаш рет куә болдым», – дейді фельдшер Эльвира Кәрімова.

Екінші фельдшер Қанат Жексембаев болса, босандыру процесіне бірінші рет тап болған екен. Оның жұмысқа кіріскеніне бар болғаны бір жыл болған. Соған қарамастан, қос фельдшер кәсіби міндеттерін адал атқарып, ана мен сәбилерді аман алып қалды. 

Айтқандай, әйел босанған соң егіздермен бірге облыстық перзентханаға жеткізілген. Атырау облыстық медициналық жедел жәрдем стансасы директорының орынбасары Наргиз Абдрахманованың айтуынша, жыл басынан бері фельдшерлер 49 жүкті ананы үйінде босандырған. Ал жыл аяғындағы егіздердің өз үйінде өмірге келуі – алғаш рет болып тұрған оқиға көрінеді.