RUS
SMARTNEWS.KZ басылымының хабарлауынша, Павлодар облысындағы Екібастұзда 27 жастағы жігіт мектепке басып кірмек болып, оқушылар мен олардың ата-аналарын шошытты. Бұл туралы Liter.kz порталы жазды.
Мәліметтерге сенсек, келеңсіз жағдай 18 қазан күні күндізгі уақытта болған. Жас жігіт өз көйлегін басына киіп алып, №26 мектепке кіруге тырысқан. Мектеп қызметкерлері оны кіргізбей қойды. Содан кейін ол жерге отырып алып, жатпақ болған.
Бұған Екібастұз білім бөлімі басшысы Лаура Дисюпованың жауап беріп, жігіт аталған мектепке жақын орналасқан ауданда тұратынын айтты.
"Ол мектепке келіп, ішке кірмек болды. Бірақ күзет қызметі дұрыс әрекет етті. Барлық жерде камералар бар. Өзім де қарап шықтым. Күзетші мен вахтер жедел әрекет ету түймесін басып, екі минут ішінде "Күзет" компаниясының қызметкерлері келді. Оларды күтіп тұрған уақытта күзетші ер адамды ұстап тұрды. Үш минуттың ішінде полиция да келіп жетті. Алгоритм бойынша бәрі дұрыс жасалды. Ер адамды бірден ауруханаға апарып, арнайы медициналық мекемеге орналастырылды. Себебі ол ақыл-есінде болмаған. Бұл жағдайға психиатрлар араласты", – деп түсіндірді Лаура Дисюпова.
Полицияның мәліметінше, ұсталған адам – 27 жастағы Екібастұз тұрғыны, оқиға кезінде ол мас күйде болған.
"Ұсталған кезде ер адамның қатты мас күйде екенін байқаған полиция қызметкерлері жедел жәрдем шақырды. Оны тексергеннен кейін ауруханаға жатқызылды", – деді Павлодар облыстық полиция департаменті.
Сонымен қатар жігіттің әрекеттерінен ешкім зардап шекпегені анықталды. Оған қандай да бір жаза қолдану туралы шешім әлі қабылданған жоқ.