RUS
SMARTNEWS.KZ басылымының хабарлауынша, квадробинг субмәдениетіне еліктейтін жастар көбейді. Өзін «хайуан» санайтын жастардың бұл қылығы туралы дін өкілдері не дейді? Мұндай жаңа ағымды ҚМДБ өкілі Елбек Тасболатұлы Құрандағы сүрелерді мысал етіп алып, жануарға еліктеуші жастардың бұл әрекеті – «шайтанның адамды азғыруынан» деп келдірді. Бұл туралы BES.media мәлімдеді.
Мүфтият өкілі квадробер болу исламдағы белгілі бір нормаларға қарсы шығу екенін жеткізді. Оның айтуынша, «хайуанға» еліктеу дінде тыйым салынған әрекет.
Дін өкілі Елбек Тасболатұлы Құрандағы Алланың сөзіне сүйене отырып, мәселеге қатысты мүфтияттың ұстанымын айқындады.
"Алла Тағала Құрандағы "Исра" сүресінің 70-аятында: "Расында, біз адамды құрметті, қасиетті қылдық", – деген. Бұл жаратылыстың ең ардақтысы, ең абыройлысы – адам дегенді білдіреді. "Әт-Тин" сүресінде: "Біз адамзатты ең кемел етіп жараттық" делінген. Сырт келбетіміз, аяқпен жүруіміз – Алланың бізге берген сыйы", – дейді мүфтият өкілі.
Сондай-ақ ол "Ниса" сүресінің 119-аятына сілтеме жасай отырып, шайтанның мұсылмандарды қалай адастыруға тырысатынын айтты.
"Ниса сүресінің 119-аятында Алла Тағала шайтанның адамзатты "Мен адамзатқа Алланың жаратылысын өзгертуді бұйырамын" деп азғыратынын баяндайды. Бұл аяттан біз квадроберлердің жануарларға еліктеп, дініміз тыйым салған әрекеттерді жасайтынын аңғарамыз. Бұл Алланың адам баласын қасиетті еткеніне қайшы келеді", – дейді Елбек Тасболатұлы.
Журналистің "исламда мұны харам деп санауға бола ма?" деген сауалына мүфтият өкілі “харам емес, тыйым салынған әрекет” деп жауап берген.
Айта кетейік, жануарға еліктеп, соның іс-қимылын қайталап, дауысын салып, олардың азығын жейтіндер - «квадроберлер» деп аталады. Олар бетперде мен құйрық тағып, ит-мысықтың жасағанын қайталайды.