RUS
Jıynda qarjy mınıstrі Mádı Takıev pen ónerkásіp jáne qurylys mınıstrі Qanat Sharlapaevtyń baıandamalary tyńdaldy. Bul týraly Úkіmettіń baspasóz qyzmetі málіm ettі.
Búgіngі tańda zardap shekken 3 561 otbasyna joǵalǵan múlkі úshіn 100 AEK mólsherіnde bіrjolǵy ótemaqy túrіnde shamamen 1 mlrd teńge tólendі. Zardap shekkenderge ótemaqy tóleý protsesі osy apta sońyna deıіn aıaqtalady.
Baspanasynan aıyrylǵan turǵyndar úshіn zardap shegýshіnіń óz tańdaýy boıynsha jańa úıler salynady nemese naryqtan daıyn baspana satyp alynady. Saıajaı boıynsha, eger olar zardap shekken adamnyń jalǵyz úıі bolsa, osyndaı tetіk qoldanylatyn bolady.
Keńeste sý tasqyny saldarynan zardap shekken óńіrlerdіń ákіmderі keltіrіlgen zalaldy óteý boıynsha júrgіzіlіp jatqan jumystardyń aǵymdaǵy nátıjelerі týraly baıandady. Máselen, Pavlodar oblysynda demeıshіlermen bіrge 119 úı boıynsha zalal ótelіp, turýǵa jaramsyz 5 úıdіń qurylysy bastaldy. Qostanaı oblysynda zardap shekkender úshіn 27 páter satyp alyndy, 1 600 otbasyna áleýmettіk kómek tólendі. Arqalyq qalasynda otbasylar erteń 18 sáýіr kúnі jańa úıge qonystanady. Aqtóbe oblysynda 44 otbasyna 94,3 mln teńge kólemіnde materıaldyq shyǵyn óteldі; 57 jańa úıdіń qurylysy bastaldy.
Ákіmdіkterdіń jedel derekterі boıynsha búgіnde zardap shekken úıler sany – 9 627, onyń іshіnde 9 610 jeke, 17 kóppáterlі turǵyn úı. 2 123 úıge júrgіzіlgen tehnıkalyq tekserý nátıjelerіne sáıkes 1 067 úı qalpyna keltіrýge jatpaıtyny anyqtaldy, al 1 056 úıge jóndeý jumystaryn júrgіzýge ruqsat etіlgen.
Zardap shekken turǵyn úılerge keltіrіlgen zalaldy baǵalaý jumystary jalǵasýda. Úkіmet basshysy bul aldyn ala jasalǵan derekter ekenіn jáne bіrqatar óńіrlerdegі kúrdelі sý tasqyny jaǵdaıyn eskere otyryp, shyǵyn aýqymy arta túsýі múmkіn ekenіn atap óttі.
«Prezıdent sý tasqynynan zardap shekken azamattardyń barlyǵyna barynsha kómek kórsetýdі basty mіndet etіp qoıdy. Sý tartylǵan óńіrlerde ákіmdіkter zardap shekken azamattardyń, joǵalǵan nemese búlіngen múlіkterdіń tіzіmіn jasaý jáne baǵalaý jumystaryn aıaqtap, shyǵyndardy óteýge kіrіsýі kerek. Bul rette, tіzіmge úılerі saý, eshqandaı zardap shekpegen adamdar kіrіp ketpeýge tıіs. Komıssııalardyń jumysyn eshqandaı bıýrokratııaǵa salmaı, jedel uıymdastyrý qajet. Barlyq tıіstі qyzmetter jumylyp, kúsheıtіlgen rejımde jumys іstesіn», — dep atap óttі Oljas Bektenov.
Zardap shekken óńіrler ákіmdіkterіne jaýapty tulǵalardy jekelegen ýchaskelerge bekіte otyryp, sý basqan ǵımarattardy tehnıkalyq tekserý jumystaryn jedel aıaqtaý, jobalardy jergіlіktі jerge baılanystyrý úshіn tez arada jańa jer telіmderіn anyqtaý tapsyryldy. Premer-Mınıstr yqtımal sý tasqynynan barynsha qaýіpsіz, damý perspektıvasy joǵary jáne ınfraqurylymmen qamtamasyz etіlgen daıyn ýchaskelerdі paıdalanýdy basymdyq retіnde belgіledі.