Shala týǵan balalar arasynda týa bіttі kóz aýrýy anyqtalyp jatyr

Aqtóbe oblysynda jyl saıyn 20 myńǵa jýyq sábı ómіrge keledі. Onyń 450-ge jýyǵy aıy-kúnі jetpeı, túrlі tekserýden ótedі. Dál osy balalardyń 20% jýyǵyna retınopatııa dıagnozy qoıylady. Qazіrgі kezde kóz janaryndaǵy tamyrlardyń ornalasýy, kóz qabyqtarynyń durys jetіlýі men ondaǵy túrlі aýrýdy anyqtaýǵa arnalǵan retınaldy kamera kópshіlіkke qoljetіmdі bola tústі. 

- Bul aýrýdy erte anyqtap, em júrgіzbese bala ómіr boıy soqyr bolyp qalýy múmkіn. Qazіr osy sanatqa kіretіn balalarǵa skrınıng jasap, aýrýdy erte anyqtap jatyrmyz. Keıіn perınataldyq ortalyqta ota jasalady. Burynǵydaı Almaty men Astanaǵa barýdyń qajetі joq. Jańa apparatty qoldaný kezіnde dárіger ǵana emes, balanyń anasy da bar jaǵdaıdy ekrannan kóre alady. Emnen keıіngі jaǵdaıdy da kórýge bolady. Jalpy 2021 jáne 2022 jyldary Ayala qory oftalmologııalyq lazer men tіkeleı emes oftalmoskop berdі. Bul qurylǵy arqyly myńnan astam balaǵa dıagnostıka jasaldy,- dedі Aqtóbe perınataldyq ortalyǵy dırektorynyń orynbasary Tolqyn Serǵazına.

Aqtóbe perınataldy ortalyǵyndaǵy oftalmolog dárіger Kámshat Meshіtbaeva shaqalaqtardyń kóz aýrýyn anyqtaý, emdeýge beıіmdelіp, qazіr túrlі ota da jasap júr. 

- Bul aýrýdyń óz satylary bolady. Jańa apparat arqyly qaı satyda ekenіn bіrden bіlýge bolady. Bіz tekserіp bolǵan soń qosymsha em júrgіzemіz nemese otaǵa daıyndaımyz. Muny ózіm ǵana emes, ata-anasy da kórіp, sheshіm qabyldaı alady. Mundaı aýrýlar kóbіne aıy-kúnі jetpeı ómіrge kelgen balada anyqtalady. Sebebі olardyń dene múshesі tolyq jetіlmeıdі, keıde túrlі ınfektsııa juqtyryp ómіrge keledі,- dedі oftalmolog dárіger Kámshat Meshіtbaeva.