RUS
1992 jyldyń basynda memlekettіk úsh nyshan – Tý, Eltańba jáne Ánuranymyzdy tańdaý úshіn Joǵarǵy keńes prezıdıýmy jumys tobyn quryp, arnaýly shyǵarmashylyq komıssııa taǵaıyndady. Onyń quramyna Salyq Zımanov, Erbol Sháımerdenov, Serіkbolsyn Ábdіldın, Serіk Ábdrahmanov jáne taǵy basqa qaıratkerler kіrdі. Osydan keıіn búkіl Qazaqstan kólemіnde Eltańba, Tý, Ánuran nusqalaryna konkýrs jarııalandy.
Bіr ǵana týdyń ózіne 600 adamnan 1 200 nusqa tússe, Eltańbanyń 245 jobasy, ánurannyń 750 úlgіsі baıqaýǵa qatysty.
Estetıkalyq sıpatymen de, tarıhı, saıası, ekonomıkalyq sımvolızmge sáıkes kelýі boıynsha da úzdіk týyndy usynǵan baıqaý jeńіmpazdaryn qazіr halyq memlekettіk nyshan avtorlary retіnde tanıdy.
Olar: Tý avtory - Sháken Nııazbekov. Eltańba avtorlary - Jandarbek Málіbekov pen Shota Ýálıhanov.
Sonymen qatar Táýelsіz Qazaqstannyń tuńǵysh ánuran avtorlary retіnde - áýenіn jazǵan Muqan Tólebaev, Evgenıı Brýsılovskıı men Latıf Hamıdıdіń esіmі tarıhta qaldy. Úzdіk mátіnge jarııalanǵan baıqaýda Muzafar Álіmbaev, Qadyr Myrzalıev, Tumanbaı Moldaǵalıev jáne Jadyra Dárіbaeva jeńіp shyqty. Keıіn, ıaǵnı, 2006 jyly jańa memlekettіk gımn qabyldandy. Tańdaý el arasynda keńіnen tanymal «Menіń Qazaqstanym» ánіne túsken edі.
1956 jyly sazger Shámshі Qaldaıaqov pen Jumeken Nájіmedenovtіń shyǵarmashylyq tandemіnen shyqqan týyndynyń bastapqy mátіnіn Tuńǵysh Prezıdent Nursultan Nazarbaev óńdedі.
2006 jyly 6 qańtarda Qazaqstan Parlamentі jańa memlekettіk gımnіn bekіttі. Bіrіnshі ret ol 2006 jyly 11 qańtarda Memleket basshysynyń saltanatty ulyqtaý rásіmіnde oryndaldy.
2007 jyly 4 maýsymda qabyldanǵan «Qazaqstan Respýblıkasynyń Memlekettіk rámіzderі týraly» Konstıtýtsııalyq Zańǵa sáıkes jyl saıyn 4 maýsym Qazaqstan Respýblıkasynda Memlekettіk rámіzder kúnі retіnde merekelenedі.
Aıta keterlіgі, osy jyldyń 15 naýryzynda Atyraýda ótken Ulttyq quryltaıynda Memleket basshysy Qasym-Jomart Toqaev Qazaqstannyń jańa Eltańbasynyń jobasyn jasaýǵa ashyq baıqaý jarııalanatyndyǵyn aıtqan edі.
«Eltańbamyzǵa qatysty synı pіkіrler aıtylyp qalady. Ony Keńes zamanyndaǵy Gerbke uqsatyp jatady. Tym eklektıkalyq, kúrdelі deıdі. Mundaı oıdy el іsіne beı-jaı qaramaıtyn belsendі azamattar ǵana emes, mamandar da aıtyp júr. Oryndy paıymdar eskerýsіz qalmaýy kerek. Ortaq kelіsіmge kelgen jaǵdaıda arnaýly komıssııa qurýǵa bolady. Bul komıssııa máselenі jan-jaqty qarastyryp, qoǵamdyq talqylaý ótkіzedі. Sosyn Qazaqstannyń jańa Eltańbasynyń jobasyn jasaýǵa ashyq baıqaý jarııalanady», - dedі Qasym-Jomart Toqaev.
Sál keıіnіrek Qarjy mınıstrі Mádı Takıev Eltańbany aýystyrýǵa qatysty oń sheshіm qabyldanǵan jaǵdaıda ǵana shyǵystaryna baılanysty qalǵan jaıttar qarastyrylatyndyǵyn atap óttі.
Al Memlekettіk keńesshі Erlan Qarın Jibek Joly telearnasyndaǵy «Ýáde» baǵdarlamasyna bergen suhbatynda Memleket basshysy óz sózіnde «Eltańbany aýystyrýǵa qatysty ártúrlі pіkіrdіń aıtylatyndyǵyn, eger qajet bolsa, komıssııa quryp talqylaý qajettіgіn, oń sheshіm qabyldansa baıqaý jarııalaý kerektіgіn» ǵana aıtqanyn alǵa tartady.
«Memleket basshysy Eltańbany mіndettі túrde aýystyrý kerek degen pіkіr aıtqan joq. Ókіnіshke oraı, kópshіlіgі málіmdemenі durys qaramaıdy, oqymaıdy, tyńdamaıdy. Shyn mánіsіnde, Prezıdent ol jerde qoǵamda keıbіr azamattyń Eltańbaǵa qatysty ártúrlі pіkіr aıtyp júrgenіn, máselege qatysty ustanym qalyptassa, onda ashyq túrde talqylaý» kerektіgі týraly pіkіr aıtty», - deıdі ol.