ShQO-ny Qazaqstannan bólіp, bólek memleket qurǵysy kelgen ekі separatıst 5 jylǵa qamaldy
Óskemen qalasynyń ekі turǵyny separatıstіk áreketterdі nasıhattaǵany úshіn 5 jylǵa bas bostandyǵynan aıyryldy.
ShQO prokýratýrasy baspasóz qyzmetіnіń málіmetіne súıensek, ekі azamat ulttyq jáne áleýmettіk arazdyqty qozdyratyn jarııalanymdar jasap, úgіt-nasıhat júrgіzgen.
«Tergeý barysynda olardyń 2024 jyldyń aqpan aıynda ınternet-resýrstardy (chat-rýletka) paıdalanyp, Shyǵys Qazaqstan oblysyn Qazaqstan Respýblıkasynan bólý maqsatynda referendým ótkіzý qajettіgі týraly oıyn bіldіrgenі belgіlі boldy. Referendýmda oń nátıjege qol jetpegen jaǵdaıda oblysty kúshtep basyp alý qajettіgіn nasıhattaǵan», - dep habarlady vedomstvodan.
Óskemen qalalyq № 2 sotynda qaralǵan sot іsіnde aıyptalýshylar óz kіnálaryn tolyq moıyndap, ókіnetіnіn jetkіzdі.
«Sot úkіmіmen sottalýshylar 5 jylǵa bas bostandyǵynan aıyryldy. Sot úkіmі zańdy kúshіne endі. Memlekettіń qaýіpsіzdіgі men tutastyǵyn qamtamasyz etý máselelerі quqyq qorǵaý jáne arnaıy organdardyń erekshe baqylaýynda», - delіngen habarlamada.