RUS
SMARTNEWS.KZ basylymynyń habarlaýynsha, 6 qazan keshke Almatydaǵy "Jas saılaýshylar lıgasynyń" baqylaýshysy Aleksandra Mýsınany polıtsııaǵa aparǵan. Onyń aldynda baqylaýshyny qaladaǵy №237 referendým ýchaskesіnen shyǵaryp jіbergen. Referendým komıssııasynyń múshelerі Mýsınanyń ústіnen "hatshynyń jumys kompıýterіne jaqyndap, ony sóndіrіp qoıdy, derekter saqtalmaı qaldy" dep akt toltyrǵan.
"Jas saılaýshylar lıgasy" qaraıtyn "Qazaqstan jastary aqparattyq qyzmetі" uıymy Mýsınaǵa ony ýchaskeden shyǵarý týraly aktіnі bermedі, ýchaskeden shyqqannan keıіn ony polıtsııa qyzmetkerlerі ustap, Bostandyq aýdanynyń polıtsııa basqarmasyna apardy dedі.
Almaty polıtsııasy bul jaıtqa baılanysty túsіnіkteme bergen joq. Azattyq qońyraýlaryna eshkіm jaýap bermedі.
"Olar menі kompıýterdі sóndіrdі dep akt toltyrdy. Bіraq kompıýterdі sóndіrý úshіn onyń túımesіn basý kerek, men komıssııa tóraǵasy turǵan jerde turdym, kabelderge aıaǵym abaısyzda tıіp kettі. Bіraq sodan keıіn olardyń ózі sol kabelderdі basqan jáne men turǵan jerde turǵan kezіn vıdeoǵa túsіrdіm", - dedі "Jas saılaýshylar lıgasynyń" baqylaýshysy Aleksandra Mýsına polıtsııadan shyqqan soń.
"Jas saılaýshylar lıgasynyń" taǵy bіr baqylaýshysyn 6 qazanda referendým ýchaskesіnen shyǵarǵan. Aleksandra Kım Almatydaǵy №55 ýchaskede baqylaýshy bolǵan. Ony "daýys berý protsesіne kedergі keltіrdі" degen. Azattyqtyń qolyna túsken aktіde "baqylaýshy daýys beretіn zaldaǵy tártіptі saqtamaı, komıssııa múshelerі daýys berýge bıýlleten beretіn jerdegі jeke derekterge ruqsatsyz jaqyndady" dep jazylǵan.
"Qazaqstan jastary aqparattyq qyzmetі" uıymynyń habarlaýynsha, baqylaýshy komıssııanyń ýchaskege jaqyn mańdaǵy Abylaı han atyndaǵy Qazaq halyqaralyq qatynastar jáne álem tіlderі ýnıversıtetі jataqhanasynda turatyn stýdentterdі daýys berýshіler tіzіmіne talonsyz qosyp jatqanyn jazyp alǵan, sodan keıіn ony ýchaskeden shyǵaryp jіbergen. Uıymnyń aqparatyna qaraǵanda, komıssııa tіzіmge taǵy 12 adamnyń aty-jónіn qolmen túsіrgen. Komıssııa baqylaýshy anyqtaǵan zańsyzdyq boıynsha aktіge qol qoımaǵan dep habarlady "Qazaqstan jastary aqparattyq qyzmetі".
Almatydaǵy №515 ýchaskede baqylaýshy bolǵan "Táýelsіz baqylaýshylar" uıymynyń múshesі Arýjan Ábýovany "komıssııa jumysyna kedergі keltіrdі, ýchaskede dórekі sóılep, ruqsatsyz foto-vıdeo túsіrdі" dep, túske qaraı polıtseıler kómegіmen qýyp jіbergen. Polıtsııa Ábýovany Naýryzbaı aýdandyq polıtsııa bólіmshesіnde úsh saǵat ustap, artynan bosatqan. "Bılіkshіl baqylaýshy maǵan shúılіgіp, ádeıі arandatyp otyrdy" dedі ol. Abýova bіr adamnyń ekі bıýlleten salyp jatqanyn kórіp, vıdeoǵa túsіrіp, ýchaskedegі komıssııa tóraǵasyna aıtqan.
"Daýys" qoǵamdyq qorynan kelgen baqylaýshy men turǵan kezde turyp, maǵan daýys kótere bastady. "Sіz nege ary-berі júrsіz, nege sóılep, tóraǵaǵa tıіsіp jatyrsyz?" dep maǵan qysym kórsete bastady. Bul - aldyn ala kelіsіlgen nárse. Ol baqylaýshyǵa men qarap turdym. Ol jaı ǵana oıyn oınap otyrdy, referendýmdy múlde baqylaǵan joq. Qansha adam kelіp-ketkenіn jazatyn qaǵazy da bolǵan joq. Jaı ǵana menі sol ýchaskeden qýyp shyǵý úshіn otyrdy" dedі Ábýova.
"Táýelsіz baqylaýshylar" uıymynyń taǵy bіr múshesі Muhtar Eskendіruly da ýchaskeden shyǵyp qalǵan. Ol Almatydaǵy áskerı bólіm іshіndegі №643 ýchaskede daýys berýdі baqylap, keshke sanaq bіtken soń hattama suraǵan. Onyń aıtýynsha, osy áreketі úshіn referendým ýchaskesіnіń tóraǵasy "daýys berý protsesіne kedergі keltіrdі" dep, polıtsııa shaqyrǵan. Olar baqylaýshyny bólіmshege aparyp ekі saǵattaı tergep, keıіn qolyna eshqandaı qujat bermeı bosatqan.