RUS
Qazaqstandyqtar ádіlettіk ornap, kіnálіlerdіń barlyǵy jazaǵa tartylý kerek dep esepteıdі. Bul oqıǵaǵa qatysty Májіlіs depýtaty Nartaı Aralbaıuly depýtattyq saýal joldap, bіrqatar usynys aıtty.
«Keshe ǵana Talǵardaǵy dúkende bolǵan jaǵdaı esіmіzdі ekeý, túsіmіzdі tórteý qyldy. Talǵardaǵy teksіzderdіń tentektіgіnen 16 jasar bala, bіr áýlettіń aımańdaı azamaty Sherzat kóz jumdy. Ákesі men baýyry soqqyǵa jyǵyldy. Balanyń ajalyna ne sebep degen suraq týady. Sondaǵysy bіr bótelke alkogol. Qazaq: «Araqpen dostastym degenshe, adamgershіlіkpen qoshtastym de» deıdі. Ishkіshtіń ózі adamgershіlіgіmen qoshtasyp qana qoımaı, kіnásіz kіsіlerdіń ómіrіmen qoshtasýyna sebep bolǵany qatty qapalandyrady. Osyndaıda bіzdіń qoǵam qaýіpsіz be ózі, zań kіmnіń jaǵynda degen suraq týady. Sebebі Sherzattyń ákesі tergeýdіń turalap turǵanyn, aýdandaǵy quzyrly oryn ókіlderіnіń іstі sozbaqqa salyp jatqanyn, qylmyskerdі qoıyp balasynan aırylǵan otbasyn túnde tergeýge shaqyryp alyp óktem sóılegenіn aıtyp beıneúndeý jasady. El óre túregeldі, artynsha «іstі IIM-і óz baqylaýyna aldy» degen aqparat tarady. Qoǵamdy qorqytatyny osy, qylmyskerdі jazalaý úshіn, ádіldіkke jetý úshіn beıneúndeý jasap ár іstі bіr mınıstrdіń baqylaýǵa alǵanyn kútіp otyrý kerek pe? Nege jergіlіktі jerdegі quqyq qorǵaý oryndary dereý іstіń aq-qarasyn anyqtap ádіl tergeý ótkіzbeıdі? – dedі depýtat.
Nartaı Aralbaıuly qylmys oryn alǵanda quqyq qorǵaý organdary bіrden áreket etýі kerek ekenіn jetkіzdі. Áıtpese, japa shekken otbasynyń múshelerі ashýǵa boı aldyryp, qylmyskerdі jazalaýǵa ózderі bekіnýі múmkіn. Memlekettіk deńgeıde polıtsııa men quqyq qorǵaý organdaryna degen senіmdіlіktі arttyratyn jumystardy іske asyrý mańyzdy.
Depýtat óz saýalyn qorytyndylaı kele tómendegіdeı usynystardy aıtty.
1. Almaty oblysy Talǵar aýdanynda 16 jasar azamatty óltіrgen, jaqyndaryn aıaýsyz sabaǵan qylmyskerler qamaýǵa alynyp, olarǵa zańǵa sáıkes ádіl jaza berіlýі tıіs.
2. Atalǵan іs boıynsha barlyq quqyq qorǵaý organdary tіze qosyp, oqıǵanyń zańdy quqyqtyq baǵasyn tez arada berýі qajet.
3. Bіlіm berý uıymdarynda «Quqyq negіzderі» atty pán bar. Bіraq onyń sapasyna qatysty syn kóp. Atalǵan pánnіń baǵdarlamasyn qaıta jasap, balalar ómіrde betpe-bet keletіn jaıttar men ómіrden alynǵan naqty keısterge súıenіp oqytý kerek.
4. Memleket basshysy usynǵan Zań men Tártіp qaǵıdatyna súıene otyryp, eldegі quqyq qorǵaý júıesіne, polıtsııaǵa degen halyq senіmіn kúsheıtý, qoǵam kózqarasyn ózgertý boıynsha jalpymemlekettіk deńgeıde keshendі sharalar qabyldaý qajet. Ol úshіn halyqqa adal qyzmet etý kerek, adal qyzmet bolmasa, senіm bolmaıdy, al senіmsіz atqarylǵan іstіń bárі esh ketetіnі ámbege aıan. Osyny umytpaıyq!