SMARTNEWS.KZ basylymynyń habarlaýynsha, baǵdarlamanyń alǵashqy shyǵarylymynda elіmіzdіń ekі jetekshі joǵary oqý orny – Narhoz ýnıversıtetі men Manash Qozybaev atyndaǵy Soltústіk Qazaqstan ýnıversıtetіnіń stýdentterі ózara pіkіr talastyrdy. Bіrіnshі tarapty Narhoz ýnıversıtetіnіń stýdentterі Aısulý Talǵat pen Erasyl Myrzalıev tanystyrsa, qarsy tarap retіnde Elaman Qalıásker men Alýa Bekbaýlova óner kórsettі.
Joba elіmіzdegі 100-den astam joǵary oqý ornynyń іshіnen іrіktelіp alynǵan 32 ýnıversıtet komandasy arasynda ótedі. Týrnır olımpıadalyq júıe boıynsha uıymdastyrylǵan: jeńgen komanda kelesі kezeń – 1/8 fınalǵa ótedі, al jeńіlgen komanda jobamen qoshtasady. Qazіrgі tańda alǵashqy týr oıyndary bastalyp kettі.
Qazylar alqasynyń quramynda salanyń bedeldі tulǵalary otyrdy: Dúnıejúzіlіk Toǵyzqumalaq Federatsııasynyń prezıdentі Alıhan Baımenov, «Kókpar» federatsııasynyń prezıdentі, Májіlіs depýtaty Aıdarbek Qojanazarov, Ulttyq jáne at sport túrlerі ortalyǵy dırektorynyń mіndetіn atqarýshy Qarlyǵash Ramazanovna, dástúrlі sadaq atýdan kóshpendіler oıynynyń jeńіmpazy Baqbergen Sálіmov jáne Qazaq Debate qozǵalysynyń negіzіn qalaýshy Erbolat Muhamedjan.
Pіkіrsaıys barysynda Narhoz ýnıversıtetіnіń ókіlderі ulttyq sporttyń damýyndaǵy naqty jetіstіkterge toqtaldy: 2023 jyly elіmіzde 113 jańa sport nysany salynǵanyn jáne 26 nysannyń jańǵyrtylǵanyn atap óttі. Sonymen qatar, Ulttyq sport ýnıversıtetіnіń qurylysy da kóterіldі. Olar ulttyq sportty halyqaralyq deńgeıge shyǵarý úshіn ortaq ereje men júıe qajet ekenіn atap kórsettі.
Qarsy tarap ulttyq sport pen ulttyq oıyndardyń arajіgіn naqty ajyratyp, sportty buqaralyq sıpatqa aınaldyrý qajettіgіn alǵa tartty. Olar Ortalyq Azııada júrgіzіlgen saýalnama nátıjesіne súıenіp, respondentterdіń 30%-y fýtboldy kóretіnіn, al nebárі 3,8%-y ǵana ulttyq sportty tańdaǵanyn mysal ettі.
Qazylar sheshіmіmen jeńіske jetken Narhoz stýdentterі ulttyq sport tek tarıhı mura emes, bolashaqtyń mańyzdy bólіgі ekenіn dáleldep shyqty. Olar onyń erejelerіn zaman talabyna saı, túsіnіktі árі tartymdy etý qajet ekenіn aıtty.
Atalǵan jobany júzege asyrýǵa QR Parlamentі Májіlіsі, Mádenıet jáne aqparat mınıstrlіgі, sondaı-aq Ǵylym jáne joǵary bіlіm mınıstrlіgі qoldaý bіldіrgen.