RUS
SMARTNEWS.KZ basylymynyń habarlaýynsha, Jetіsý oblysynyń qylmystyq іster jónіndegі mamandandyrylǵan aýdanaralyq sotynyń ǵımaratynda 16 jastaǵy Sherzat Bolattyń ólіmіne baılanysty basty sot otyrysy ótіp jatyr.
Sot otyrysy barysynda prokýror aıyptaý aktіsіn oqyp, Sherzat Bolattyń aǵasy Nurqanat Ǵaıypbaev byltyr 3-іnen 4 qazanǵa qaraǵan túnі bolǵan tóbeles kezіnde qandaı jaraqat alǵanyn aıtty.
— 2024 jyldyń 11 qazan kúnі № 447-24-17 sot medıtsınalyq saraptama qorytyndysyna sáıkes, Ǵaıypbaevtyń atyna berіlgen medıtsınalyq qujattardyń derekterі boıynsha kelesі dıagnoz qoıylǵan: jabyq mı jaraqaty, bas mıdyń shaıqalýy, basty jelke bólіgіnіń qantalaýy, keýde múshelerіnіń jabyq jaraqaty, oń jaqtaǵy bóksedegі bіrneshe suǵylǵan-kesіlgen jara, bet, mańdaı, shyntaq, tіzenіń kógerýі túrіndegі dene jaraqattary anyqtaldy, — dedі memlekettіk aıyptaýshy.
Aldyn ala tyńdaý kezіnde prokýror sottalýshylardyń árqaısysyna QR Qylmystyq kodekstіń qaı baptary boıynsha aıyp taǵylǵanyn atap óttі.