Jábіrlenýshі tarap kýáger qyzdardan qaıta jaýap alýdy surady

SMARTNEWS.KZ basylymynyń habarlaýynsha, Sherzat Bolattyń ólіmіne qatysty ótіp jatqan sot otyrysynda jábіrlenýshі taraptyń ókіlderі bіrqatar kýálardan qaıta jaýap alýdy surady.

Atap aıtqanda, jábіrlenýshі taraptyń advokattary Elmıra Nurbekova men Arlan Qazykenovtі sotqa qaıta shaqyryp, qosymsha jaýap alýdy usyndy. Olar keshe kórsetіlgen beınejazba negіzіnde atalǵan kýálardyń oqıǵa kezіnde «shok jaǵdaıynda» bolmaǵanyn jáne mán-jaıdy bіlіp otyrǵanyn alǵa tartty.

— Beınejazbadan olardyń jaǵdaıdy tolyq túsіnіp turǵanyn kórdіk. Qylmysqa qatysy bolýy múmkіn degen ýájben olardy qaıta shaqyrýdy suraımyz, — dedі jábіrlenýshіlerdіń advokaty.

Alaıda sýdıa bul ótіnіshtі qanaǵattandyrýdan bas tartty. Onyń aıtýynsha, atalmysh tulǵalardyń qylmysqa qatysy bar-joǵy boıynsha tergeý organdary naqty sheshіm shyǵarmaǵan.

— Bul máselede tergeý organdarynyń sheshіmі joq. Sondyqtan olardy qaıta shaqyrýǵa negіz joq, — dep túsіndіrdі sýdıa.

Sondaı-aq jábіrlenýshі tarap sotqa taǵy bіr ótіnіshhat joldady. Onda jábіrlenýshіler Jumabıke Qadyrova, Qarjaýbaı Nurymov jáne Gúlbaram Bıshembıeva densaýlyǵyna baılanysty sotqa kele almaıtyndaryn, burynǵy bergen jaýaptaryn qoldaıtyndaryn jáne іsterіnіń óz qatysýlaryna qaramastan jalǵasýyn suraǵan.

Alaıda bul ótіnіshke sottalýshy Abzal Shynasyldyń qorǵaýshysy qarsy pіkіr bіldіrdі.

— Olar jaýaptaryn bіrneshe ret ózgertken. Sondyqtan qaı jaýabyna toqtaıtynyn ózderіnen naqtylap suraý kerek, — dedі advokat Juman Ábenov.

Degenmen sýdıa bul jaıt boıynsha sot tergeýі bastalǵanǵa deıіn barlyq tarapqa qajettі suraqtardy qoıý múmkіndіgі berіlgenіn aıtyp, іstі jábіrlenýshіlerdіń qatysýynsyz qaraýdy jalǵastyrý týraly sheshіm shyǵardy.