RUS
«Sotqa Parlament Májіlіsі men máslıhattar depýtattyǵyna kandıdattardan 166 aryz túsken. Onyń іshіnde Joǵarǵy sotqa 55, mamandandyrylǵan aýdanaralyq ákіmshіlіk sottarǵa 104 jáne aýdandyq sottarǵa 7 aryz berіldі. Búgіnde sotta 164 aryz-shaǵym qaraldy. Onyń іshіnde 49 іs qanaǵattandyryldy, 84 іs boıynsha qanaǵattandyrýdan bas tartyldy, 15 talap qoıýshy aryzyn kerі qaıtaryp aldy jáne sot 16 aryzdy qaraýsyz qaldyrdy», - dedі Ortalyq saılaý komıssııasynyń múshesі Asylbek Smaǵulov.
Aýdandyq komıssııalardyń sheshіmderіmen Parlament Májіlіsіnіń depýtattyǵyna 6 kandıdattyń quqyǵy qalpyna keltіrіlgen.
«Onyń іshіnde Astana qalasy boıynsha beseý jáne Shymkent qalasy boıynsha bіreý. Sotqa túsken 166 aryzdyń 135-і depýtattyqqa kandıdattar usynǵan aktıvter men mіndettemeler týraly deklaratsııalardaǵy málіmetterdіń durys emestіgі týraly, sol sııaqty memlekettіk kіrіs organdarynan aqparat usynylǵannan keıіn saılaý komıssııalary qabyldaǵan kandıdattardy tіrkeýdіń kúshіn joıýǵa qatysty», - deıdі ol.
Onyń aıtýynsha, Saılaý týraly Konstıtýtsııalyq zańnyń 89-baby 4-3-tarmaǵynyń 4-tarmaqshasyna, 104-baby 6-1-tarmaǵynyń 4-tarmaqshasyna sáıkes okrýgtіk saılaý komıssııasy deklaratsııada aktıvter men mіndettemeler týraly málіmetterdіń durys emestіgі anyqtaǵan jaǵdaıda kandıdatty tіrkeý týraly sheshіm kúshіn joıady.