Gaagadaǵy Halyqaralyq qylmystyq sot Pýtındі tutqyndaýǵa order berdі
Gaagadaǵy Halyqaralyq qylmystyq sot Reseı prezıdentі Vladımır Pýtındі tutqyndaýǵa order berdі. Bul habar sottyń resmı saıtynda jaryq kórdі. Pýtınmen qosa, Reseıdіń bala quqyqtary jónіndegі ýákіlettі ókіlі Marııa Lvova-Belovany da tutqyndaýǵa pármen berіlgen.
Halyqaralyq qylmystyq sot ekeýіne de Ýkraınanyń okkýpatsııalanǵan aımaǵynan halyqty, sonyń іshіnde balalardy kúshtep kóshіrіp, áskerı qylmys jasady dep aıyptaǵan. Halyqaralyq quqyqta bul genotsıd dep tanylýy múmkіn.
Reseı bul sottyń ıýrısdıktsııasyn moıyndamaıdy. Máskeý 2016 jyldan berі sottyń áreketіn anyqtaıtyn Rım statýtyna qatyspaıdy. Al sot áskerı qylmys jasady dep aıyptalyp jatqan memleket basshylarynyń ımmýnıtetіn moıyndamaıdy.
"Reseı Halyqaralyq qylmystyq sottyń Rım statýtynyń múshesі emes, ol boıynsha mіndettemelerі joq. Reseı bul organmen árіptes emes, al Halyqaralyq qylmystyq sot berdі degen tutqyndaý týraly áldebіr "retsepttіń" bіz úshіn quqyqtyq salmaǵy joq" dedі Reseı syrtqy іster mınıstrіnіń resmı ókіlі Marııa Zaharova.
Lvova-Belovanyń ózі Reseı "balalardy maıdan alańynda qaldyrmaı, qamqor bolyp", "olarǵa jaqsy jaǵdaı jasap jatqanyn" aıtty. "Barlyq eldіń sanktsııasy boldy, tіptі Japonııa da maǵan sanktsııa saldy, endі tutqyndaýǵa order berіptі, árі qaraı ne beredі eken, kóreıіk" dedі ol Reseıdіń RBK saıtyna.