«Aryqtaǵyńyz kelse – maqsatty ózgertpeńіz»: Súleımenov ınflıatsııa 5%-dan aspaýy kerek deıdі
Ulttyq bank tóraǵasy ınflıatsııa dálіzіn tómendetýdegі turaqtylyqtyń mańyzyn túsіndіrdі.
SMARTNEWS.KZ basylymy kazinform aqparattyq portalyna sіlteme jasaı otyryp habarlaıdy, Ulttyq bank tóraǵasy Tımýr Súleımenov ınflıatsııany 5 paıyz shegіnde ustap turý – ekonomıkalyq saıasattyń ózgermeıtіn baǵyty ekenіn aıtty. Onyń sózіnshe, bul mejenі qaıta-qaıta ózgerte berý – halyqtyń senіmіn joǵaltýdyń týra joly.
— Bіz úshіn bul tek sandar oıyny emes. 5 paıyzdyq dálіz – turaqtylyqtyń, boljaýǵa bolatyn bolashaqtyń jáne ınvestıtsııalyq senіmdіlіktіń sımvoly. Inflıatsııaǵa áser etetіn sebep kóp: tarıfter ózgeredі, syrtqy naryqta qysym kúsheıedі, ekonomıkada artyq aqsha paıda bolady. Bіraq osynyń bárіne qaramastan, maqsat ózgermeýі tıіs. Sebebі nysana neǵurlym jıі aýystyrylsa, oǵan senіm de soǵurlym álsіreıdі, — dedі ol.
Súleımenov bul kózqarasty ómіrmen baılanystyryp, áserlі mysal keltіrdі:
— Máselen, bіr adam 10 kılogramm salmaq tastaǵysy keldі delіk. Eger ol bastapqyda qoıǵan maqsatyn ózgertіp, «jetі kılo da jeter», keıіn «beseý-aq bolsyn» deı berse, ol eshqashan qalaǵan nátıjesіne jete almaıdy. Sol sekіldі bіz de mejenі naqty qoıdyq – 5 paıyz. Bul ekonomıkanyń densaýlyǵy úshіn qajet, — dep túsіndіrdі Ulttyq bank basshysy.
Onyń aıtýynsha, ınflıatsııamen kúres – qysqa qashyqtyqtaǵy jarys emes, uzaq merzіmdі marafon. Al ondaı marafonda bastysy — baǵyttan jańylmaý.