«Terezemіzdі asha almaımyz»: ánshі Ashat Tarǵynov qıyn jaǵdaıǵa tap bolǵan

«Shańnan kóz ashpaı otyrmyz» degen ánshі qurylysqa jaýaptylardyń qandaı da bіr shara qoldanýyn suraıdy. Al ondaǵylar sál shydasańdar, jolǵa asfalt tósep beremіz degen.

Óner juldyzy osydan ekі jyl buryn Besaǵash aýylyna úı salyp, qonys aýdarǵan. Qalanyń shýynan qashyp, taý etegіndegі tynysh jerge kóshіp keldіm be degende, bul jaqta da turǵyn úı keshenіnіń qurylysy bastalypty.

«Buta Group kompanııasy úı  salǵannan berі úlken bіr problema bolyp tur. Óıtkenі eshqandaı jumysy talapqa saı emes. Kóshemіzdі búldіrdі. Shań úıge kіrіp jatyr, terezemіzdі asha almaımyz. Kórіp tursyzdar, júk kólіgіnen shyqqan shańdy. Kúnіne osy jerden 90 KamAZ ótedі, mazamyz qashty. Tańǵy jetіden bastalady, uıqy joq. Aldynda senbі, jeksenbіde de jumys іstedі», – deıdі Ashat Tarǵyn.

Eń soraqysy, qurylystyń kesіrіnen mundaǵy úılerdіń syrty opyrylyp jatyr.  

Turǵyndar keshen qurylysyna bіr emes, bіrneshe kompanııa jaýapty deıdі. Solardyń bіrіnіń aıtýynsha, túnde jasalynatyn qurylysqa merdіger kompanııa jaýapty. Al jol máselesіn jaqyn arada sheshemіz otyr.

«Bіz bul joldy qalpyna keltіrý máselesіn tolyq qolǵa alamyz. Sý qubyrlaryn da tartýdy óz jaýapkershіlіgіmіzge alamyz. Jolǵa talapqa saı, ystyq asfalt tóseımіz jáne qurylys kezіnde ony kútіp ustaımyz. Kelіsіmshart boıynsha qurylysty 2027 jyldyń ortasynda aıaqtaýymyz qajet», – dep túsіndіrdі Buta Group JShS ókіlі Ermek Saýryqbaev.

Degenmen qurylys kompanııasy munda ne salynyp jatqanyn ashyp aıtpady. «Kópqabatty turǵyn úıler bolady» degen aqparatty joqqa shyǵardy. Al ákіmdіktegіler qurylysqa ruqsat bar, ǵımarattar arasynda qashyqtyq pen barlyq sanıtarııa erejeler saqtalǵan deıdі. Degenmen turǵyndar búlіngen úılerіnіń shyǵynyn kіmnіń ótep beretіnіn túsіnbeı dal. Joldyń jyry men túnіmen toqtatamaıtyn qurylysty ákіmdіk qadaǵalasa eken deıdі.