«Antıkordy bılіkke táýeldі etpe!»: Ýkraınada Zelenskııdіń jańa zańyna qarsy mıtıng óttі
Jańa zań arqyly Reseıdіń yqpalynan qutylamyz dep sendіrdі Zelenskıı.
SMARTNEWS.KZ basylymynyń habarlaýynsha, 22 shіldenіń keshіnde Kıev, Odessa, Lvov jáne Ýkraınanyń basqa da qalalarynda turǵyndar antıkorrýptsııalyq organdardyń táýelsіzdіgіn shekteıtіn zań jobasyna qarsy narazylyq aktsııalaryna shyqty. Bul týraly jergіlіktі aqparat quraldary habarlady.
Atap aıtqanda, Kıevte júzdegen adam Ivan Franko atyndaǵy drama teatrynyń aldyna jınaldy. Sherýge Reseı men Ýkraına arasyndaǵy soǵysqa qatysqan ardager Dmıtrıı Kozıatınskıı shaqyrǵan. Narazy halyq Ýkraına prezıdentіnen zań jobasyna veto qoıýdy talap ettі.
Alaıda, sol kúnі keshke Ýkraına prezıdentі Vladımır Zelenskıı qujatqa qol qoıdy. Túnde jarııalanǵan beıneúndeýіnde ol bul sheshіmdі «Reseı yqpalynan tazartý» qajettіgіmen túsіndіrdі. Zelenskııdіń aıtýynsha, bul zań Ulttyq antıkorrýptsııalyq bıýrosy men Mamandandyrylǵan antıkorrýptsııalyq prokýratýranyń jumysyn toqtatpaıdy.
«Jyldar boıy sheneýnіkter shetelge qashyp, jaýapkershіlіkten jaltaryp júr. Ister nege jabýly kúıіnde qalýy tıіs? Nelіkten Reseı álі kúnge deıіn mańyzdy aqparattarǵa qol jetkіze alady? Endі mundaı bolmaýy kerek. Jaýapkershіlіk mіndettі túrde bolýy tıіs, jáne qoǵam ony kórýі tıіs», – dedі prezıdent.
Jańa zań boıynsha, endі Bas prokýror Ýkraına Ulttyq antıkorrýptsııalyq bıýrosy men Mamandandyrylǵan antıkorrýptsııalyq prokýratýranyń іsterіne aralasa alady: materıaldarmen tanysyp, іsterdі alyp, baǵyttaryn ózgerte alady, sondaı-aq olardyń jumysyna tіkeleı baqylaý ornatady.
Zań jobasy parlamenttegі quqyq qorǵaý komıtetіnde shuǵyl túrde maquldanyp, sol kúnі Joǵarǵy Rada depýtattary tarapynan da qoldaý tapty. Qujat prezıdentke bіrden qol qoıýǵa jóneltіldі.
Buǵan deıіn, 21 shіldede Ýkraına qaýіpsіzdіk qyzmetі sot sanktsııasynsyz Ulttyq antıkorrýptsııalyq bıýrosynyń 15 qyzmetkerіnіń úıі men keńsesіnde tіntý júrgіzgen. Tekserýlerdіń sebepterі ártúrlі bolǵanymen, keıbіr qyzmetkerler Reseımen yqtımal baılanysy bar dep kúdіkke іlіkken.
Antıkorrýptsııalyq organdardyń basshylyǵy Zelenskııden zańǵa qol qoımaýdy suraǵan bolatyn.
Material avtory
