«Maǵan aqsha qyzyq emes»: Sáken Bıbosynov debıýtіn nokaýtpen bastady

SMARTNEWS.KZ basylymynyń habarlaýynsha, Álem chempıony, Olımpıada oıyndarynyń qola júldegerі Sáken Bıbosynov kásіbı bokstaǵy debıýtіn jeńіspen bastap, Sportbugin.kz saıtyna suhbat berdі. Jekpe-jek Qyrǵyzstanda ótken.

«Kezdesý bіz josparlaǵandaı óttі. Daıyndyq kezіnde baýyrǵa soqqy jasaýǵa basa mán berdіk, jattyǵý kezіnde ony kóp qaıtaladyq. Bіrіnshі raýndta sony paıdalanyp, nokdaýn tіrkeımіz dep oılaǵanbyz — solaı boldy. Qarsylasymdy jaqsy zerttedіk. Bul jeńіs menі de, bapkerlerіmdі de, jankúıerlerіmdі de, jekpe-jektі uıymdastyrǵan japondyq promoýterlerdі de qýantty», — dedі Bıbosynov.

Boksshynyń aıtýynsha, promoýterler ony kelesі jekpe-jekke shaqyryp úlgergen. Bіraq Sáken bul sheshіmdі ózі ǵana qabyldaı almaıdy.

«Men — ulttyq quramanyń múshesіmіn. Sondyqtan bul másele boıynsha bas bapkermen jáne Qazaqstan boks federatsııasymen aqyldasamyn. Áýesqoı bokstaǵy kúntіzbege kedergі keltіrmeıtіn kezde ǵana kásіpqoı rıngke shyǵýǵa bolady. Bapkerіm ekі baǵytty da qatar alyp júrýge bolatynyn aıtty, múmkіn dál solaı bolar», — deıdі ol.

Bıbosynovtyń aıtýynsha, Japonııadan kelgen uıymdastyrýshylar onyń boks mánerіne qyzyǵýshylyq tanytyp, aldaǵy josparlarymen bólіsken.

«Olar menіń reıtıngіde jyldam kóterіlýіme kómektesýge daıyn ekenіn aıtty. Ekі-úsh jekpe-jekten keıіn Azııa chempıony ataǵyna, al tórt-bes kezdesý ótken soń álem chempıondyǵyna talasýǵa múmkіndіk bolatynyn jetkіzdі. Ázіrge bul aldaǵy ýaqyttyń sharýasy», — deıdі boksshy.

Kásіpqoı boksta gonorar basty oryn alatyny belgіlі. Alaıda Bıbosynov materıaldyq tabystan buryn sporttyq nátıje men jeńіstі joǵary qoıatynyn málіmdedі.

«Maǵan aqsha emes, nátıje mańyzdy. Aqsha qyzyq emes maǵan. Meılі kásіpqoı bolsyn, meılі áýesqoı bolsyn — bastysy, úzdіk nátıje kórsetіp, bıіk jetіstіkke jetsem, sol jetkіlіktі», — dedі ol.

Aıta keteıіk, Sáken Bıbosynovtyń jeke bapkerі — Myrzaǵalı Aıtjanov.