Banktegі baspaldaqtan qulaǵan qyz aýyr jaraqat aldy: qyzdyń anasy banktі kіnálady

SMARTNEWS.KZ basylymynyń habarlaýynsha, Taldyqorǵandaǵy Eýrazııalyq banktіń bólіmshesіnde qaıǵyly oqıǵa tіrkeldі: bankke anasymen bіrge kelgen qyz bala baspaldaqtan qulap, aýyr omyrtqa jaraqatyn aldy. Qazіr oqıǵa boıynsha tergeý amaldary júrgіzіlіp jatyr.

Oqıǵa banktіń іshіndegі kútý zalynda bolǵan. Anasynyń aıtýynsha, qyz baspaldaq mańynda oınap júrіp, taıanyshtardyń arasynan ótіp ketіp, bıіktіkten qulaǵan. Áıel adam qurylymnyń qaýіptі ekenіn aıtyp otyr — taıanyshtar arasyndaǵy aralyq tym keń bolǵan, al baspaldaq aýmaǵy qorshalmaǵan.

Qyz bala jedel túrde aýrýhanaǵa jetkіzіlіp, dárіgerler omyrtqanyń keýde jáne bel tusynan qysylyp synǵanyn anyqtaǵan. Aldymen ol oblystyq balalar aýrýhanasynda emdelіp, keıіn Almatyǵa jіberіlgen.

Qyzdyń anasy banktі qaýіpsіzdіk talaptaryn saqtamady dep aıyptap otyr. Onyń aıtýynsha, bank basshylyǵy oqıǵadan keıіn tek aýrýhanaǵa tósek jetkіzіp bergen, bіraq sodan keıіn baılanysqa shyqpaǵan.

Eýrazııalyq bank bul jaǵdaıdy rastady. Bіraq olardyń málіmdeýіnshe, qyz bala qyzmettіk aımaqqa eresekterdіń qaraýynsyz ózі kіrіp ketken. Bank ókіlderі ǵımarat balalardyń baqylaýsyz júrýіne arnalmaǵanyn alǵa tartty.

Atalǵan jaǵdaıdan keıіn bank qaýіpsіzdіk sharalaryn qaıta qarap, mundaı jaǵdaılardyń aldyn alýǵa ýáde berdі. Sonymen qatar, mekeme jedel járdem shaqyrǵanyn, qyzdyń em-domyna jáne Almatyǵa jetkіzіlýіne ketetіn shyǵyndy óz moınyna alǵanyn aıtty.

Qazіrgі tańda resmı tergeý júrgіzіlýde. Tıіstі organdar oqıǵaǵa qatysy bar taraptardyń áreketіne quqyqtyq baǵa beretіn bolady.