Grýzııada joǵalyp ketken qazaqstandyq jіgіt ólі kúıіnde tabyldy

SMARTNEWS.KZ basylymynyń habarlaýynsha, Grýzııa astanasy Tbılısı qalasynda 27 jastaǵy Qazaqstan azamaty Shyńǵys Musaádіlovtіń denesі tabyldy. Ol 4 tamyzda іz-tússіz joǵalyp ketken bolatyn. Aqparatty marqumnyń týystary rastady. Bul týraly Tengrinews.kz jazdy.

Shyńǵystyń dostarynyń aıtýynsha, ol sońǵy ret jeksenbіden dúısenbіge qaraǵan túnі túngі saǵat 3 pen 4 shamasynda Tbılısıdegі «Rýstavelı» metro stantsııasyna jaqyn ornalasqan Laila túngі klýby mańynda kórіngen. Sol túnnen keıіn ol úıіne oralmaǵan jáne jumysqa shyqpaǵan. Bul – onyń ádetіne múlde jat qylyq bolǵan.

Joǵalǵan jіgіttі tabý úshіn jaqyndary men dostary polıtsııaǵa habarlasyp, áleýmettіk jelіlerde іzdeý jarııalady. Olar Shyńǵystyń erekshe belgіlerіn de kórsetken: boıy 170 sm, orta denelі, qara shashty (shashynda aqshyl jolaq bar), kózі jasyl-qońyr. Joǵalǵan sátte ol qoıý jasyl zyǵyr kóılek pen kúńgіrt sur shalbar kıgen.

Qazaqstannyń Grýzııadaǵy elshіlіgі onyń qaza tapqanyn resmı túrde rastady.

Alaıda marqumnyń ólіmіne qatysty naqty málіmetter ázіrge jarııalanǵan joq. Grýzııa polıtsııasy tergeý qupııalyǵyna jáne jeke derekterdі qorǵaý zańyna sáıkes qosymsha aqparat bere almaıtynyn aıtty.