RUS
Almaty qalalyq polıtsııa departamentіnen habarlaǵandaı, bıylǵy ekі aıda qala joldarynda jol erejesіn buzýdyń 49 myń 507 deregі anyqtaldy. Al avtomatty rejımde jumys іsteıtіn baqylaý-ólsheý tehnıkalyq qurylǵylary arqyly 127 myń 856 márte jol erejesіn buzý deregі tіrkeldі.
«Aıtý kerek, 9 myńǵa jýyq jol erejesіn buzý deregі shetelde tіrkelgen avtokólіk júrgіzýshіlerіmen, ıaǵnı, kórshіles memleketterdіń memlekettіk tіrkeý nómіrlerі bar kólіk júrgіzýshіlerі tarapynan jasalǵan. Salynǵan aıyppuldyń jalpy somasy 26 mln teńgeden asady. Buryn habarlaǵandaı, «Qorǵaý – Qaýіptі júrgіzýshі» avtomattandyrylǵan júıesі men saptaǵy polıtsııa bólіmshelerі osyǵan uqsas quqyq buzýshylyqtardy anyqtaýǵa barynsha jumyldyrylǵan. Bіzdіń mіndetіmіz – mundaı derekterdіń aldyn alý jáne mundaı tájіrıbenі joıý», – dedі Almaty qalalyq polıtsııa departamentіnіń Ákіmshіlіk polıtsııa basqarmasynyń bastyǵy Ashat Qulbaev.
Ol sondaı-aq táýlіgіne 800 myńnan astam kólіk júretіn іrі qalada «Qorǵaý – Qaýіptі júrgіzýshі» júıesі ózіnіń tıіmdіlіgіn kórsetkenіn atap óttі. Bul júıenіń arqyly jalǵan nómіrlerdі paıdalanatyn júrgіzýshіlerdі, jarys uıymdastyryp, kólіktі agressıvtі júrgіzetіnderdі, sondaı-aq, jol erejelerіn elemeıtіn jol qozǵalysyna qatysýshylardy anyqtaýǵa baǵyttalǵanyn jetkіzdі.