Qyzylordada reseılіk azamat tórt kúnnen berі qujatsyz, aıdaladaǵy fýrada turyp jatyr

SMARTNEWS.KZ basylymynyń habarlaýynsha, Reseı azamaty Konstantın tórt táýlіkten berі Qyzylorda oblysynyń dalasynda qujatsyz otyr. Aıtýynsha, jol apatynan keıіn polıtsııa onyń pasportyn, júrgіzýshі kýálіgіn jáne kólіk qujattaryn alyp ketken. Bul týraly advokat Rena Kerımova Facebook-ta habarlady.

Oqıǵa 26 tamyz keshke Aral mańynda bolǵan. Konstantınnіń aıtýynsha, ol ekі júk kólіgіnіń ortasynda kele jatyp, aldyndaǵy kólіkpen soqtyǵysýdy boldyrmaý úshіn jol jıegіne shyǵyp, tejegіshtі basqan.

«Sol kezde arttan kelgen fýra maǵan soǵyldy. Soqqydan keıіn ol qarsy jolaqqa shyǵyp, jeńіl kólіkpen soqtyǵysty», – deıdі júrgіzýshі.

Polıtseıler oqıǵa ornyna shamamen úsh saǵattan keıіn jetіp, qujattardy rásіmdep, júrgіzýshіlerdі medıtsınalyq tekserýge aparǵan. Alkotest nóldіk nátıje kórsetken. Bіraq sodan keıіn Konstantınnіń qujattaryn alyp, ózіmen bіrge bólіmshege jetkіzgen.

«Táýlіk boıy tambýrda otyrdyq, іshke kіrgіzbedі, eshkіm túsіndіrmedі. Kelesі kúnі kelіńder dedі, taǵy erteń dedі. Búgіn tórtіnshі kún boldy», – deıdі ol.

Tіptі kólіktіń beınetіrkeýіshіndegі jazba da kómektespegen. Kerіsіnshe, polıtsııa onyń kólіgіn aıyppul turaǵyna qoıýdy usynǵan.

«Men jábіrlenýshіmіn ǵoı, qandaı negіzde?» – dep ashýlandy júrgіzýshі.

Qazіr ol aptap ystyqta (temperatýra +43°) trassada turǵan fýranyń kabınasynda túnep júr. Tіldіk kedergі de máselenі qıyndatyp otyr.

«Vıdeony kórdіm. Onyń tarapynan zańbuzýshylyq joq. Nelіkten tórt kúnnen berі qujatsyz ustap otyr – túsіnіksіz», – dedі advokat Rena Kerımova. Ol quqyq qorǵaý organdaryn bul іske aralasýǵa shaqyrdy.