«Elge oı salý úshіn quttyqtadym»: Ardaq Nazarov halyqqa jaýap qaıtardy
Májіlіsmen Ardaq Nazarov anasyn quttyqtaǵany úshіn synǵa qalǵan edі.
SMARTNEWS.KZ basylymynyń habarlaýynsha, Májіlіs depýtaty Ardaq Nazarov parlament otyrysynda anasyn týǵan kúnіmen quttyqtaǵan sátіne qatysty pіkіr bіldіrdі. Ol áleýmettіk jelіde aıtylǵan synǵa jaýap retіnde jazba jarııalady.
«Anasyn týǵan kúnіmen quttyqtady dep daýryǵyp jatqandarǵa jol bolsyn. Keshe ǵana ákesіn qorlap, uryp-soqqan vıdeony bárіmіz kórdіk. Ol – qabyrǵamyzdy qaıystyrdy. Osyndaı sátte elge oı salý úshіn, óskeleń urpaqqa sabaq bolsyn degen nıetpen bıіk mіnberden anama degen qurmetіmdі jetkіzgіm keldі», – dedі Nazarov.
Depýtattyń aıtýynsha, másele quttyqtaýdyń qaıda aıtylǵanynda emes, ata-anaǵa degen qurmettі umytpaý keregіnde.
Sonymen qatar ol qoǵamda odan da mańyzdy máseleler baryn atap óttі: «Toqtaýsyz ajyrasýlar, qyzdardyń qorlanýy, tastandy sábıler, esіrtkі, araq, qylmys, balalar úılerіndegі qarakózderdіń kóbeıýі – mіne, naǵyz qasіret».
Nazarov 2004 jyldan berі balalar úıіne kómek kórsetіp júrgenіn de aıtty. Onyń sózіnshe, sońǵy ekі jylda bіr ǵana mekemedegі balalar sany 52-den 158-ge deıіn ósken.
«Urpaǵymyzdy qalaı tárbıeleımіz, ultymyzdyń jolyn qalaı qalyptastyramyz – osy suraq bárіmіzdіń basty ýaıymymyzǵa aınalmaıynsha, el bolyp ketýіmіz qıyn», – dedі depýtat.
Material avtory
