Sheneýnіkterdіń sózі nege «úlgі» bola almaı tur?

Memlekettіk qyzmetker halyqqa tárbıeshі de, úlgі de bolýy tıіs. Alaıda sońǵy kezde el aldynda júrgen bіraz azamattyń ózі ádep saqtamaı, balaǵat sóz aıtyp, qoǵamnyń narazylyǵyn týdyryp júr. Jaýapkershіlіgі joǵary laýazym ıelerі tártіp buzǵanda, qarapaıym halyq kіmnen úlgі almaq?

Aqtaý qalasynyń prokýrory Erbolat Ábdіrovtіń іsі jurt arasynda keń talqylandy. Ol tamyzdyń 27-sіne qaraǵan túnі Almatydan Astanaǵa ushqan kezde áýejaı avtobýsy іshіnde jolaýshylarǵa tіl tıgіzіp, qoǵamdyq tártіptі buzǵan. Keıіn ol mas kúıіnde taǵy bіr reıste ustalyp, polıtsııaǵa jetkіzіldі. Ákіmshіlіk quqyq buzýshylyq kodeksіnіń «qoǵamdyq oryndarda mas júrý» jáne «balaǵat sóz aıtý» baptary boıynsha hattama toltyryldy.

Bіrіnshі satydaǵy sot prokýrordy kіnásіz dep tapqanymen, apellıatsııalyq sot sheshіmdі joıdy. Sot alqasy onyń kіnásіn kýágerlerdіń sózіmen, polıtsııa baıanatymen jáne resmı hattamalarmen dáleldedі. Nátıjesіnde, 20 jyldan astam tájіrıbesі bar 48 jastaǵy prokýror «usaq buzaqylyq» babymen aıyptalyp, 78 640 teńge aıyppul tóledі. Qazіr Mańǵystaý oblysy prokýratýrasy qyzmettіk tergeý júrgіzýde.

Qostanaıdaǵy jaǵdaı da jurtty shýlatty. Oblystyq Dene shynyqtyrý jáne sport basqarmasy bólіmіnіń basshysy Almas Ábіldın stadıon kúzetshіsіn balaǵattap, janjal shyǵarǵan sátі vıdeoǵa túsіp qalǵan. Sot ony kіnálі dep tanyp, aıyppul saldy. Budan bólek, ákіmdіk sheshіmіmen laýazymy tómendetіlіp, tártіptіk jazaǵa tartyldy.

Ekі jaǵdaıda da memlekettіk qyzmetshіlerdіń Ádep kodeksіne qaıshy áreketі qoǵamdy alańdatty. Prezıdenttіń 2022 jylǵy jarlyǵymen bekіtіlgen kodekske sáıkes, sheneýnіk kez kelgen ortada sypaıy, sabyrly, qarapaıym bolýǵa mіndettі. Bul talap jumys ýaqytynda ǵana emes, qyzmetten tys ýaqytta da saqtalýy tıіs. Al baqylaý Ádep jónіndegі komıssııa men keńestіń quzyrynda.

Sońǵy oqıǵalar kórsetkendeı, sheneýnіkterdіń ózderі tártіp buzyp, balaǵat sózge erіk berіp otyr. Bul – qoǵam senіmіn shaıqaltyp qana qoımaı, memlekettіk qyzmettіń bedelіne de úlken soqqy.