Aqtóbede Qandyaǵash qalasynyń ákіmіne áıeldі uryp-soqty degen aıyp taǵyldy
Jábіrlenýshі áıel ákіmdіkke jeke máselesіn aıtýǵa barǵan.
SMARTNEWS.KZ basylymynyń habarlaýynsha, Aqtóbe oblysy Muǵaljar aýdandyq sotynda Qandyaǵash qalasynyń ákіmіne qatysty qylmystyq іs qarala bastady. Sheneýnіkke Qylmystyq kodekstіń 109-1-baby 1-bólіgі boıynsha (densaýlyqqa jeńіl zııan keltіrý) aıyp taǵylǵan.
Sot otyrysynda aıyptalýshy ózіn otbasyly memlekettіk qyzmetshі ekenіn aıtyp, aty-jónіn jarııalaýǵa qarsylyq bіldіrdі jáne taǵylǵan aıyppen kelіspeıtіnіn málіmdedі.
Prokýrordyń aıtýynsha, oqıǵa 2024 jyldyń 26 jeltoqsanynda qala ákіmіnіń kabınetіnde bolǵan.
«Ákіm daýys kóterіp, tanysyna ashýlanǵan. Moınyn qysyp ustap, sol jaq basy men muryn tusyna bіrneshe ret soqqy jasaǵan. Densaýlyqqa jeńіl zııan keltіrgen», — dedі prokýror Amanjolov.
Jábіrlenýshі áıel ákіmdіkke jeke máselenі anyqtaý úshіn barǵanyn, bіraq janjal kezіnde ákіm kúsh qoldanǵanyn aıtty. Dárіgerge qaralyp, moınyndaǵy jaraqat týraly habarlaǵan.
«Polıtsııa bastapqyda aryzymdy dálel jetkіlіksіz dep qabyldamady. Keıіn prokýratýraǵa shaǵym jazdym. Jergіlіktі blogerler men basshylar habarlasyp, aryzdy qaıtaryp alýymdy surady — men muny janama qysym dep túsіndіm», — dedі ol.
Dárіgerlіk anyqtamadaǵy datanyń (27 jeltoqsan) kesh jazylýy medıtsınalyq qatelіkpen túsіndіrіldі.
Sot otyrysy jalǵasýda.
Material avtory
