Qazaq uny AQSh-ta «Product of Kazakhstan» tańbasymen satyla bastady

Qazaqstanda óndіrіlgen un AQSh naryǵyna shyqty. Nıý-Iorkke alǵashqy 50 tonna bıdaı uny jetkіzіlіp, Amazon men Walmart onlaın-dúkenderіnde satylymǵa qoıyldy. Qaptamada «Product of Kazakhstan» degen belgі bar, bul – otandyq ónіmnіń sapasy men ekologııalyq tazalyǵyn kórsetetіn brend.

Amazon

Saýda jáne ıntegratsııa mınıstrlіgіnіń qoldaýymen ashylǵan QazTrade keńsesі Vashıngtonda jumys іstep tur. Bul ókіldіk Qazaqstan men AQSh arasyndaǵy onlaın-saýdaǵa jáne dıstrıbýtsııaǵa jol ashyp jatyr. Qazіr amerıkalyq meıramhanalarmen jáne іrі saýda jelіlerіmen kelіssózder júrgіzіlýde. Bolashaqta aı saıyn 100 tonnadan astam qazaqstandyq un jetkіzý josparda bar. Sondaı-aq AQSh naryǵyna qaraqumyq, talqan, granola, shokolad jáne kakao sııaqty basqa da azyq-túlіk ónіmderіn shyǵarý kózdelgen.

Saýda statıstıkasy:
Ulttyq statıstıka bıýrosynyń málіmetіnshe, 2024 jyly Qazaqstan men AQSh arasyndaǵy taýar aınalymy 4,2 mlrd dollar bolǵan. Sonyń іshіnde Qazaqstan eksporty 30%-ǵa ósіp, 2 mlrd dollarǵa jettі. Qazіr AQSh-qa eń kóp eksporttalatyn ónіmder – munaı, kúmіs jáne ferroqorytpalar.

AQSh-tan Qazaqstanǵa negіzіnen ushaqtar men qosalqy bólshekter, tehnıka, dárі-dármek, qus etі jáne kólіk quraldary keledі.

QazTrade keńsesіnіń ashylýy ekі el arasyndaǵy saýda baılanysyn kúsheıtіp, Qazaqstannyń tutynýshylyq taýarlaryn amerıkalyq naryqqa shyǵarý múmkіndіgіn keńeıtedі dep kútіlýde.

Avtory Serіk Aldan