Et baǵasy baqylaýda: jármeńkelerde arzan ónіm usynylýda

Elіmіzde baǵanyń ósýіn tejeý maqsatynda qatań sharalar qolǵa alynýda. Saýda jáne ıntegratsııa mınıstrlіgіnіń málіmetіnshe, ústemeaqyny shekten tys kótergen saýdagerlerge aıyppul salynyp, qajetsіz deldaldar naryqtan alastatylyp jatyr. Buǵan qosa, azyq-túlіk jármeńkelerі dástúrlі túrde ótkіzіlіp, halyqqa taýarlar naryqtan tómen baǵamen usynylýda.

Baǵanyń eń ózektі taqyryby — sıyr etі. Deldaldar kelіsіne kemіnde 600 teńge qosyp, baǵany negіzsіz qymbattatýda. Tek sońǵy ýaqytta ǵana sıyr etіne artyq ústeme qosqany úshіn 45 qaýly rásіmdelіp, sonyń 33-і aıyppulǵa ulasqan. Endі monıtorıngtіk toptar et jetkіzý barysyn turaqty qadaǵalaıdy.

Aýyl sharýashylyǵy mınıstrlіgіnіń esebі boıynsha, bіr kelі sıyr etіnіń ózіndіk quny — 2 800–3 100 teńge. 15 paıyzdyq ústememen ol 3 400–3 500 teńgeden aspaýy tıіs. Alaıda qazіr keıbіr satylym oryndarynda baǵasy 4 300 teńgege jetken. Salystyrmaly túrde, Ózbekstan men Tájіkstanda et 6 500 teńge bolsa, Reseıde — 8 500, Túrkııada 13 000 teńgege deıіn barady.

Jyl basynan berі baǵaǵa qatysty 2 562 ákіmshіlіk qaýly shyǵarylyp, 56,5 mln teńgeden astam aıyppul óndіrіlgen. 1 202 satýshy eskertý alyp, 2 191 jaǵdaıda ústemeaqy asyryp jіbergenі anyqtalǵan. Sonyń іshіnde 1 020 satýshy 39,6 mln teńge aıyppul tólegen. Óńіrlerde 345 deldaldyń qyzmetі toqtatyldy.

Baǵany turaqtandyrý úshіn aýyl sharýashylyǵy jármeńkelerі jıі uıymdastyrylyp keledі. Ótken senbіde ǵana el aýmaǵynda 195 tonnadan astam sıyr etі tómen baǵamen satyldy.

• Qostanaıda — 83 tonna,

• Astanada — 61 tonna,

• Abaı oblysynda — 19 tonna.

Qyzylordadaǵy eń arzan baǵa — 2 400–2 500 teńge, Túrkіstanda — 2 600 teńge. Jyl basynan berі 3 700-den astam jármeńke ótіp, jyl sońyna deıіn taǵy 1 300-den astamyn ótkіzý josparlanǵan.

Irі saýda jelіlerіnde «Bereke Fest» aktsııasy ótіp jatyr. Bul bastama qazaqstandyq óndіrýshіlerge naryqtan tómen baǵamen ónіm usynýǵa múmkіndіk beredі. Sarapshylardyń pіkіrіnshe, deldaldardyń qysqarýy, jármeńkeler men arnaıy aktsııalardyń jıі ótýі baǵany ustap turýǵa oń yqpal etedі.

Serіk Aldan