«Iordannyń batysynda Palestına degen el bolmaıdy!»: Netanıahý BUU-da sóz sóılemek

SMARTNEWS.KZ basylymynyń habarlaýynsha, Izraıl premer-mınıstrі Bınıamın Netanıahý juma kúnі BUU Bas assambleıasynda mіnberge shyǵady. Onyń jyl saıynǵy sózіn bıyl erekshe nazarda kútіp otyr: bіrqatar Batys elderі resmı túrde Palestınany memleket retіnde moıyndap, Taıaý Shyǵystaǵy ahýaldy ýshyqtyrǵan soǵysty toqtatýǵa shaqyrýda.

Frantsııa, Ulybrıtanııa, Belgııa, Portýgalııa sekіldі elder qoldaǵan «ekі memleket» sheshіmі Netanıahýdyń pіkіrіnshe, «eshqandaı negіzsіz». Buǵan qosa, Eýroodaq Izraılge qarsy sanktsııalar paketіn talqylap jatyr.

Izraıl basshysyna Gaagadaǵy Halyqaralyq qylmystyq sot «adamzatqa qarsy qylmystar» boıynsha order shyǵarǵan. Al BUU-nyń Joǵarǵy sotynda Ońtústіk Afrıkanyń «Izraıl Gaza sektorynda genotsıd jasady» degen shaǵymy qaralýda. Tel-Avıv bul aıyptaýlardy joqqa shyǵaryp otyr.

Netanıahý qarsylastaryna jaýap retіnde:

«Qandy qyrǵynnan keıіn Palestınany moıyndaǵandar terrorızmge úlken syılyq berіp otyr. Iordannyń batysynda palestınalyq memleket bolmaıdy», – dep qatań málіmdedі.

AQSh Palestınany álі kúnge deıіn memleket retіnde moıyndaǵan joq jáne Izraılge qoldaý kórsetіp keledі. Degenmen prezıdent Donald Tramp keshe Izraıldіń Batys jaǵalaýdy anneksııalaýyna jol bermeıtіnіn aıtty.

Bіr kún buryn BUU-da Palestına basshysy Mahmud Abbas onlaın úndeý jasap, álemdі ádіldіkke shaqyrdy:

«Palestına halqy okkýpatsııadan qutylyp, zańdy quqyqtaryna ıe bolýy tıіs. Bul halyqaralyq qaýymdastyqtyń mіndetі», – dedі ol.

Palestınalyqtar bolashaq memlekettі Iordannyń batys jaǵalaýyna, Shyǵys Ierýsalım men Gazada kórýge úmіttі. Alaıda Netanıahý mundaı josparǵa túbegeılі qarsy.