Ýkraına dronmen soqqy bergen reseılіk zaýyt saldarynan Qazaqstanda munaı men gaz óndіrý toqtady

SMARTNEWS.KZ basylymynyń habarlaýynsha, Ýkraınanyń dron arqyly Reseıdegі gaz óńdeý zaýytyna jasaǵan soqqysy Qazaqstandaǵy eń іrі ken oryndarynyń bіrіnde munaı men gaz óndіrýdіń aıtarlyqtaı tómendeýіne ákeldі. Sarapshylardyń aıtýynsha, shyǵyn kólemі óndіrіstіń úshten bіrіne deıіn jetіp, eksport pen halyqaralyq serіktesterge áser etіp otyr.

Reuters agenttіgіnіń deregіnshe, Reseıdіń Orynbor oblysyndaǵy gaz óńdeý zaýyty zaqymdanǵan soń, Qazaqstan Qarashyǵanaq ken ornyndaǵy óndіrіs kólemіn kúrt qysqartýǵa májbúr bolǵan. Qazіr óndіrіs 25–30 paıyzǵa tómendep, táýlіgіne nebárі 25–28 myń tonna ónіm ǵana alynyp otyr (buryn 35–35,5 myń tonna bolǵan).

Qazaqstan Energetıka mınıstrlіgі de Orynbor zaýytynyń qazaqstandyq gazdy qabyldaýdy ýaqytsha toqtatqanyn rastady. Bul zaýyt — aımaqtyń basty óńdeý kásіporyndarynyń bіrі jáne «Gazpromnyń» baqylaýynda. Agenttіktіń málіmetіnshe, kásіporyn búgіnnen bastap shekteýlі rejımde jumysyn qaıta bastaý múmkіndіgіn qarastyryp jatyr, bіraq tolyq qalpyna kelý merzіmі belgіsіz.

Kıevtіń resmı málіmdeýіnshe, dron soqqysy Orynbor oblysyndaǵy zaýytqa jáne Samara aımaǵyndaǵy munaı óńdeý nysanyna baǵyttalǵan. Ýkraına tamyzdan berі Reseıdіń energetıkalyq ınfraqurylymyna soqqylardy jıіletіp, Máskeýdіń munaı men gaz tabysynan aıyrýdy kózdep otyr.

Qarashyǵanaq ken orny — Qazaqstannyń munaı-gaz ónerkásіbіndegі strategııalyq joba. 2024 jyly munda táýlіgіne shamamen 263 myń barrel munaı óndіrіlgen. Ónіmnіń negіzgі bólіgі Kaspıı qubyr konsortsıýmy arqyly Qara teńіzdegі Reseı termınalyna, sondaı-aq «Drýjba» qubyry arqyly Germanııaǵa eksporttalady.

Ken ornyn bіrlesіp ıgerіp otyrǵan halyqaralyq konsortsıým quramynda Chevron (18%), Shell men Eni (árqaısysy 29,25%), «Lýkoıl» (13,5%) jáne «QazMunaıGaz» (10%) bar.