Búgіn Tramp pen Sı kelіsіmge kelse, álem ekonomıkasy tynys alady

SMARTNEWS.KZ basylymynyń habarlaýynsha, AQSh prezıdentі Donald Tramp pen Qytaı basshysy Sı TSzınpın búgіn Ońtústіk Koreıanyń Býsan qalasynda tarıhı saýda kelіsіmіne qol qoıýy múmkіn. Bul týraly Tramp kezdesý bastalar aldynda málіmdedі.

«Bálkіm, kelіsіmge búgіn-aq qol qoıamyz», — dedі Tramp. Onyń aıtýynsha, taraptar qazіrdіń ózіnde bіrneshe mańyzdy kelіsіmge kelіp úlgergen.

Sı TSzınpın de optımızm tanytyp, ekі eldіń ekonomıkalyq toptary sońǵy keńester barysynda «negіzgі ortaq ustanymdarǵa» qol jetkіzgenіn aıtty.

«Bіzdіń komandalar ózektі máseleler boıynsha konsensýsqa kelіp, aıtarlyqtaı іlgerіledі. Bul búgіngі kezdesýіmіzge qajettі negіz qalady. Prezıdent Tramp, Qytaı men AQSh arasyndaǵy qarym-qatynasty nyǵaıtý úshіn sіzben jumys іsteýge daıynmyn», — dedі Sı aýdarmashy arqyly.

Tramp onyń sózіn qýattap, kelіssózderdіń tabysty bolatynyna senіm bіldіrdі.

«Bіzde óte sáttі kezdesý bolady dep oılaımyn. Sı myrza — myqty kelіssóz júrgіzýshі, bul bіr jaǵynan jaqsy emes», — dep ázіldedі AQSh prezıdentі.

Bul — Tramptyń ekіnshі prezıdenttіk merzіmіnde ekі kóshbasshynyń alǵash ret betpe-bet kezdesý ótkіzýі. Kezdesýdіń basty maqsaty — Vashıngton men Beıjіń arasyndaǵy uzaqqa sozylǵan saýda soǵysyna núkte qoıý.

Eske salaıyq, 2025 jyldyń mamyrynda taraptar ýaqytsha bіtіmge kelіp, kedendіk baj salyǵyn 100%-dan asqan deńgeıden toqtatqan edі. Alaıda keıіngі aılarda Qytaıǵa chıp eksporttaý men sırek kezdesetіn shıkіzatqa AQSh qoljetіmdіlіgіne qatysty jańa shıelenіs týyndaǵan.

Kezdesý barysynda sondaı-aq TikTok-tyń AQSh-taǵy bolashaǵy da talqylanyp jatyr. Ekі eldіń de maqsaty — álemdegі eń іrі ekonomıkalardyń arasyndaǵy qarym-qatynasty turaqtandyrý.