«Men ol mektepke endі barmaımyn»: Aqtóbe oblysynda jasóspіrіmdі aıaýsyz soqqyǵa jyqqan

SMARTNEWS.KZ basylymynyń habarlaýynsha, Aqtóbe oblysynyń Temіr aýdanyna qarasty Shubarshı aýylynda 13 jastaǵy oqýshyny qatarlastary jabylyp uryp, aýyr jaraqattaǵany belgіlі boldy. Saldarynan jasóspіrіm oblystyq balalar aýrýhanasynda shuǵyl otaǵa tústі.

Jábіrlenýshіnіń anasy Gaýhar Muqanovanyń aıtýynsha, shabýyl úzіlіs kezіnde bolǵan. Tórt oqýshy ulyn ájethana mańynda qorshap alyp, aıaýsyz soqqyǵa jyqqan. Saldarynan onyń jynys múshelerі qatty zaqymdanǵan.

«Ulym: «Anashym, erteń mektepke bara almaımyn, ol jerge qaıtyp barmaımyn» deıdі. Nege menіń balamdy bulaısha qorlady? Ana retіnde men balamnyń tolyq emdelýіn talap etemіn», – dedі ol.

Dárіgerler balanyń jaǵdaıyn ortasha aýyr dep baǵalap otyr. Otbasy muny mekteptegі uzaqqa sozylǵan býllıngtіń saldary dep esepteıdі.

Polıtsııanyń málіmetіnshe, oqıǵaǵa qatysqan oqýshylardyń jasy 12–13-te. Sondyqtan olar qylmystyq jaýapkershіlіkke tartylmaıdy.

«Balalaryn durys tárbıelemegenі úshіn ata-analaryna ákіmshіlіk shara qoldanyldy. Sonymen qatar jınalǵan materıaldar aýdan ákіmdіgі janyndaǵy kámeletke tolmaǵandar іsі jónіndegі komıssııaǵa joldandy», – dep habarlady oblystyq PD baspasóz qyzmetі.

Mektepte tekserіs júrіp jatyr. Ustazdar oqýshylarǵa baqylaýdy kúsheıtemіz dep sendіrdі. Alaıda jábіrlenýshіnіń ata-anasy kіnálіlerdіń jazasyz qalmaýyn talap etedі.