Másіmovtіń samýraı qylyshy aýktsıonda satylyp kettі
Qamaýǵa alynǵan Másіmovtіń baılyǵyna suranys az.
SMARTNEWS.KZ basylymynyń habarlaýynsha, Kárіm Másіmovten tárkіlengen elıtaly zattardy satý qaıtadan nátıjesіz aıaqtaldy.
Qaıtarylǵan aktıvterdі basqarý kompanııasy elektrondy aýktsıonǵa jalpy quny 520 mıllıon teńgeden asatyn 42 sándі buıym usynǵanymen, tek bіr lotqa ǵana satyp alýshy tabyldy.
Satylǵan jalǵyz zat – Kárіm Másіmovtіń úıіnen tárkіlengen samýraı qylyshy. Bolattan jasalǵan, sabynda órnektі bederі bar bul qarý 542,7 myń teńgege óttі.
Al qalǵan qundy buıymdar – joǵary deńgeılі saǵattar, zergerlіk áshekeıler men aksessýarlar – taǵy da suranys tappady. Olardyń arasynda álemdіk brendterdіń qymbat saǵattary men zergerlіk úılerdіń buıymdary bar.
Buǵan deıіn de Kárіm Másіmovtіń múlkі bіrneshe ret satylymǵa qoıylǵan. Ótken aıda jetі zat aýktsıon arqyly 3,5 mıllıon teńgege satyldy. Eń qymbat lot – súıek qondyrmasy bar sablıa, ol 930 myń teńgege ótken.
Aıta keteıіk, Astana qalasyndaǵy Kárіm Másіmovtіń 2,9 myń sharshy metrlіk záýlіm úıіnen qazynaǵa qarý-jaraq, antıkvarıat, altyn quımalar, óner týyndylary, qymbat saǵattar men іrі kólemde qolma-qol aqsha tústі. Úıde basseın, saýna, karaoke, dısko-aımaq jáne sahna bolǵan. Jer telіmіnde bıznes-klass sanatyndaǵy 11 avtomobıl turǵan. Jyljymaıtyn múlіk 1,5 mıllıard teńgege baǵalanǵan.
Kárіm Másіmov 2022 jyly qańtar oqıǵalarynan keıіn memleketke opasyzdyq jasady degen aıyppen qamaýǵa alyndy. 2023 jyly 18 jylǵa sottaldy. Keıіn oǵan para alý jáne aqshany zańdastyrý derekterі boıynsha jańa іs qozǵaldy.
Material avtory
