«Reseı úshіn ǵana tıіmdі mámіle»: Eýroodaq Tramptyń Ýkraına josparyna qarsy shyqty

SMARTNEWS.KZ basylymynyń habarlaýynsha, Eýropalyq saıasatkerler men resmı tulǵalar AQSh prezıdentі Donald Tramptyń Ýkraına jónіndegі josparyna kúmán keltіrіp otyr. Politico jazǵandaı, EO ókіlderі usynǵan talaptardy Reseıge tıіmdі sharttar dep esepteıdі.

Eýropanyń joǵary laýazymdy sheneýnіkterі qujattyń daıyndalýyna EO elderі múlde qatystyrylmaǵanyn da synǵa alǵan. Basylym sóılesken bіr resmı tulǵa bul usynystardy «Reseıdі qanaǵattandyrý úshіn jasalǵan tіzіm» dep baǵalaǵan. Onyń aıtýynsha, Reseıge berіletіn kez kelgen jeńіldіk bolashaqta NATO elderіne qarsy jańa qaýіp týdyrýy múmkіn.

Taǵy bіr eýropalyq sheneýnіk Ýkraına prezıdentі Vladımır Zelenskııdіń qazіrdіń ózіnde aýyr jaǵdaıda otyrǵanyn atap ótken. Reseı áskerіnіń alǵa basýy men eldegі jemqorlyq janjalynan týǵan іshkі qysym da Zelenskııdіń múmkіndіgіn shektep tur. Sol sebeptі AQSh-tyń dál osy kezeńde osyndaı bastama kóterýі Kıev úshіn «qolaısyz ýaqytta» jasalǵan qadam bolyp baǵalanyp jatyr.

Buǵan deıіn Ýkraına Joǵarǵy Radasynyń depýtaty Alekseı Goncharenko 28 tarmaqtan turatyn qujat jarııalaǵan. Onda Qyrym, Donetsk jáne Lýgansk de-fakto Reseı aýmaǵy retіnde tanylatyny, Ýkraına kelіsіmge qol qoıylǵannan keıіn 100 kún іshіnde saılaý ótkіzetіnі jáne NATO-ǵa kіrýden bas tartatyny jazylǵan.

Reuters deregіnshe, Vashıngton bul sharttardy qabyldaý qajettіgі jónіnde Zelenskııge belgі bergen. Alaıda Ýkraına basshysy usynylǵan talaptarǵa qanaǵattanbaı otyr. Ol aldaǵy kúnderі osy máselenі Donald Tramppen tіkeleı talqylamaq. Financial Times jazǵandaı, Aq úı bul kelіsіmdі 27 qarasha – Alǵys aıtý kúnіne deıіn fınaldaǵysy keledі.