Qyrǵyzstanda Atambaevtyń uly men bіrneshe saıasatker tutqyndaldy

SMARTNEWS.KZ basylymynyń habarlaýynsha, Qyrǵyzstanda bіrqatar saıasatkerler men eldіń burynǵy prezıdentі Almazbek Atambaevtyń uly Kadyrbek Atambaev ustaldy. Olarǵa jappaı tártіpsіzdіk uıymdastyrýǵa daıyndaldy degen aıyp taǵylyp otyr.

Málіmettі Qyrǵyzstan IIM taratty. Quzyrly organnyń deregіnshe, Kadyrbek Atambaevpen bіrge Memlekettіk kúzet qyzmetіnіń burynǵy basshysy Damır Mýsakeev, Sotsıal-demokrattar partııasynyń jetekshіsі Temırlan Sýltanbekov, eks-depýtattar Shaılobek Atazov pen Kýbanychbek Kadyrov qolǵa túsken.

Vedomstvo olardyń barlyǵy 30 qarashada ótetіn parlamenttіń merzіmіnen buryn saılaýynan keıіn elde tolqýlar uıymdastyrýdy josparlaǵanyn málіmdeıdі. Tergeý nusqasyna sáıkes, top mıtıngterdі jasandy túrde kópshіlіk narazylyǵy retіnde kórsetýge, árі qaraı ákіmshіlіk ǵımarattardy, telestýdııalardy jáne kúshtіk qurylym nysandaryn basyp alýǵa umtylǵan. Bul áreketterge «krımınaldyq toptar tartylǵan bolýy múmkіn» delіnedі.

IIM taratqan aqparatqa qaraǵanda, tіntý kezіnde qarý-jaraq, oq-dárі, granata, baılanys quraldary, qujattar, esіrtkі jáne 150 myń dollar qolma-qol aqsha tabylǵan. Barlyǵyna Qyrǵyzstan Qylmystyq kodeksіnіń «Jappaı tártіpsіzdіk uıymdastyrýǵa daıyndalý» baby boıynsha aıyp taǵyldy.

Ustalǵandardyń úsheýі – Temırlan Sýltanbekov, Ermek Ermatov jáne Ýrmat Askarbekov sot sanktsııasymen qamaýǵa alyndy. Qalǵandaryna qatysty da bultartpaý sharasyn tańdaý máselesі qaralýda.

Budan bіr kún buryn eks-prezıdent Atambaevtyń áıelі men taǵy bіr uly tergeýge shaqyrylǵan. Eldіń bіrneshe óńіrіnde saıasatkerlerdіń úılerіnde tіntý júrgіzіldі. Jergіlіktі aqparat quraldary Syımyk Japykeevtіń de ustalǵanyn habarlaıdy.

Al eks-prezıdenttіń qyzy Alııa Shakıeva oryn alyp jatqan jaǵdaıdy «saıası qysym» dep atady.

Bіshkektegі sońǵy aıdyń taǵy bіr daýly oqıǵasy – qyrkúıekte táýelsіz «Kloop» portalynyń ekі burynǵy qyzmetkerіnіń 5 jylǵa sottalýy. Olarǵa «jappaı tártіpsіzdіkke shaqyrý» aıyby taǵylǵan.

Qyrǵyzstan parlamentіne merzіmіnen buryn ótetіn saılaý 30 qarashaǵa belgіlengen. Depýtattar ókіlettіgіn óz erkіmen toqtatqany úshіn saılaý 2026 jyldan alǵa jyljytylǵan.