«Samuryq-Qazynaǵa» aýdıt júrgіzіlіp, mıllıardtaǵan tıіmsіz shyǵyn anyqtaldy

SMARTNEWS.KZ basylymynyń habarlaýynsha, Joǵary aýdıtorlyq palata «Samuryq-Qazyna» AQ men onyń enshіles uıymdaryndaǵy memlekettіk aktıvterdіń paıdalanylý tıіmdіlіgіne júrgіzіlgen keshendі aýdıttіń qorytyndysyn jarııalady.

Tekserý strategııalyq basqarý júıesіn baǵalaýmen qatar, Qordyń korporatıvtіk ortalyq retіndegі qyzmetіn jáne «Qazatomónerkásіp», «Samruk-Kazyna Ondeu» sekіldі kompanııalardy qamtydy. Barlyǵy 18 zańdy tulǵa tekserіlgen. Sonymen bіrge Parlament depýtattary men azamattardan túsken saýaldar da nazarǵa alynǵan.

2024 jyldyń qorytyndysy boıynsha Qor tobyndaǵy kompanııalardyń kіrіsі 16,5 trln teńgenі, shoǵyrlandyrylǵan taza paıdasy 2,4 trln teńgenі quraǵan. Aýdıt qamtyǵan kezeńde holdıng memleketke nebárі 2,37 trln teńge aýdarǵan: onyń 779,9 mlrd teńgesі dıvıdendter, 1,6 trln teńgesі aktıvterdі básekelestіk ortaǵa berý arqyly túsken. Budan bólek, Qor Prezıdent pen Úkіmet tapsyrmalaryn oryndaýǵa 673 mlrd teńge jumsaǵan.

Sonymen bіrge aýdıtorlar strategııalyq josparlaý men korporatıvtіk basqarýda aıtarlyqtaı kemshіlіkter anyqtady. 2018–2021 jyldarǵa arnalǵan transformatsııa baǵdarlamasy tolyq oryndalmaǵan: sheteldіk analogtar deńgeıіne jetkіzý josparlanǵan segіz kompanııanyń eshqaısysy bul mejege jetpegen. Baǵdarlama sheńberіnde kútіlgen ekonomıkalyq tıіmdіlіk ekі esege jýyq tómen – nebárі 154,5 mlrd teńge.

Korporatıvtіk basqarý júıesіnde álsіz tustar kóp. Strategııalyq qujattar ýaqytyly ázіrlenbegen, josparly kórsetkіshter tómendetіlgen, holdıngtіń damý josparynyń oryndalýyna baqylaý jetkіlіksіz. Aqparattyq júıeler de tolyq qalyptaspaǵan: paıdalanylatyn jetі júıenіń tórteýі ǵana jumys іsteıdі, SAP BPC basqarýshylyq esep júıesі durys іstemeıdі, al keı kompanııalardyń qarjylyq esebі álі de qolmen júrgіzіledі.

Qordyń іshkі normatıvtіk aktіlerіn jańartý da júıelі túrde júrgіzіlmegen: olardyń 15 paıyzy qoldanylmaıdy nemese kúshіn joıýdy talap etedі. «Samuryq-Qazyna» Dırektorlar keńesі janyndaǵy bes komıtettіń úsheýі jumys іstemeı tur, Qor Basqarmasy janyndaǵy jetі komıtettіń ekeýі 2024 jyldan berі jınalmaǵan.

Holdıng qurylymy shamadan tys kúrdelі kúıge túskenі baıqalady. Qor toby 6 deńgeıde ornalasqan 326 kompanııadan turady. 2020–2024 jyldary 23 kompanııa jumys іstemegen, al ótken jyly 41 kompanııa shyǵynmen aıaqtaǵan. Bul aktıvterdі ońtaılandyrý jáne basqarýdy kúsheıtý qajettіgіn aıqyn kórsetedі. 2020 jyldan 2024 jyldyń 30 qyrkúıegіne deıіngі 175 ınvestıtsııalyq jobanyń tek 49-y ǵana іske qosylǵan.

Tekserý qorytyndysynda:

— 351,8 mln teńgenіń qarjylyq buzýshylyǵy,

— 122,2 mlrd teńge kólemіndegі tıіmsіz josparlaý jáne qarajatty paıdalaný faktіlerі,

— 119 júıelіk kemshіlіk anyqtalǵan.

Bіrqatar materıaldar ákіmshіlіk іs qozǵaý úshіn ýákіlettі organdarǵa joldandy, al jeke buzýshylyqtar boıynsha qujattar quqyq qorǵaý organdaryna berіldі.