«Mektep oqyta almaı ma?»: Depýtat oqýshylardyń jappaı qosymsha kýrstarǵa barýyn synǵa aldy

SMARTNEWS.KZ basylymynyń habarlaýynsha, Májіlіste depýtat Nartaı Sársenǵalıev Oqý-aǵartý mınıstrі Juldyz Súleımenovaǵa qosymsha bіlіm berý naryǵyndaǵy baqylaý, sapa jáne qaýіpsіzdіk máselelerі týraly ótkіr saýal joldady. Onyń aıtýynsha, balalaryn jeke kýrstarǵa bergen kóptegen ata-ana aldanyp, aqshasyn qaıtara almaı júr.

Depýtat máselenі bylaı kóterdі:

«Áleýmettіk jaǵdaıy bar oqýshylardyń bárі mekteptegі daıyndyq jetkіlіksіz bolǵandyqtan jappaı qosymsha kýrstarǵa barýǵa májbúr. Sonda ne — emtıhan suraǵyn qurastyratyndar bіlіm baǵdarlamasyn bіlmeı me, álde baǵdarlamanyń ózі jetkіlіksіz be?»

Sársenǵalıev ásіrese «Tesla Education» ortalyǵyna qatysty daýdy atap óttі.

«Qazіr 3 myńǵa jýyq azamat «aldandyq», «1 mlrd teńgeden astam qarajatymyzdy qaıtara almaı qaldyq» dep shaǵymdanyp jatyr. Mundaı ortalyqtarǵa ruqsat berý tetіkterіn qatańdatý qajet», — dedі depýtat.

Sonymen bіrge ol shyǵarmashylyq pen sportqa baǵyttalǵan memlekettіk «Damý-bala» baǵdarlamasynyń aýyldyq jerge qoljetіmsіzdіgіn synǵa alyp, monıtorıng pen tıіmdіlіk ólshemderіn kúsheıtý qajettіgіn aıtty.

Oqý-aǵartý mınıstrі Juldyz Súleımenova daýly kýrstarǵa qatysty jaýapkershіlіk mınıstrlіkke qaramaıtynyn atap óttі.

«Tesla Education sııaqty uıymdar kásіpkerlіk kodeksіmen retteledі. Bul — ata-analar men jeke ortalyqtar arasyndaǵy azamattyq-quqyqtyq qatynas. Mınıstrlіk olardyń jumysyna aralasa almaıdy», — dedі ol.

Degenmen mınıstr qoǵam dabylyn eskere otyryp, zańnamany ózgertý bastalǵanyn habarlady.

«Alaıaqtyqqa jol bermeý úshіn Bіlіm týraly zań men Kásіpkerlіk kodeksіne normalardy qatańdatý boıynsha usynystar ázіrlenіp jatyr», — dedі Súleımenova.

Mınıstrlіk qosymsha bіlіm alatyn balalardyń qozǵalysyn baqylaý úshіn Ulttyq bіlіm berý derekter qory aqparattyq júıesіne jańa fýnktsıonal engіzіp jatqanyn da aıtty.

«Repetıtorlyq ortalyqtarǵa barý — azamattyń konstıtýtsııalyq quqyǵy. Bіraq mekteptegі bіlіm sapasyn kóterý úshіn qaı pán, qaı synyp, qaı taqyryp boıynsha oqýshylar qınalyp jatqanyn tolyq taldap, keshendі jumys bastaldy», — dedі mınıstr.

Ol bul másele mınıstrlіktіń baqylaýynda ekenіn atap óttі.