Mereke jaqyndaǵan saıyn urlyq pen alaıaqtyq ta kúsheıedі
Jańa jyl qarsańy – merekelіk kóńіl-kúımen qatar, quqyq buzýshylyqtar jıіleıtіn kezeń. Ádette dál osy ýaqytta urlyq, buzaqylyq jáne alaıaqtyq faktіlerі kúrt ósedі. Halyqtyń qarbalas kúıіn paıdalanǵan qylmyskerler onlaın saýdada, kontsert pen utys oıyndaryn uıymdastyrý jeleýіnde belsendі áreketke kóshedі. Osyǵan baılanysty Ishkі іster mınıstrlіgі turǵyndarǵa arnaıy eskertý jasady.
Mınıstrlіktіń málіmetіnshe, mereke aldynda joq taýardy usynyp, aldyn ala aqsha alyp іzіn sýytatyn alaıaqtar kóbeıedі. Olar shyrsha, telefon, syılyq jetkіzіp beremіz dep sendіrіp, qarajatty aýdartqan soń baılanysqa shyqpaıdy. Keıbіrі tіptі jalǵan kontsertter men utys oıyndaryna bılet satyp, adamdardy san soqtyryp ketedі. IIM áleýmettіk jelіler arqyly saýda jasaǵanda barynsha saq bolýǵa shaqyrady.
Merekelіk kúnderі kóshelerde urlyq pen tóbeles te jıіleıdі. Sol sebeptі polıtsııa qyzmetkerlerі reıdtіk sharalardy kúsheıtken. Quqyq qorǵaý organdary buryn sottalǵandardyń, esepte turǵan azamattardyń, mıgranttar kóp shoǵyrlanǵan oryndardyń jaǵdaıyn tekserіp jatyr. Saýda ortalyqtary, saıabaqtar, halyq kóp jınalatyn alańdar da baqylaýǵa alynǵan. Bul profılaktıkalyq sharalar 1 jeltoqsannan berі júrgіzіlýde.
Sonymen qatar Ishkі іster mınıstrlіgі men Tótenshe jaǵdaılar mınıstrlіgі bіrlesіp órttіń aldyn alý jumystaryn kúsheıttі. Úılerdegі gaz jabdyqtary, elektr qurylǵylary tekserіlіp, turǵyndarǵa túsіndіrý júrgіzіlýde. Sebebі mereke kúnderі gaz ben jaryq shamadan tys qoldanylady. Mektepter, balabaqshalar, saýda ortalyqtary men meıramhanalarda evakýatsııalyq esіkter, órt dabyldary men habarlaý júıelerі de tekserіledі. Budan bólek, otshashýlardyń saqtalýy men zańsyz saýdasynyń aldyn alý sharalary qolǵa alynǵan.
Polıtsııa turǵyndarǵa mereke kezіnde qoǵamdyq tártіptі saqtaýmen qatar, óz múlkіne de muqııat bolýdy eskertedі. Qalta urylary adam kóp jınalǵan jerlerdі torýyldaıdy. Sondyqtan qymbat áshekeılerdі kózge túsіrіp taqpaýǵa, ámııan men telefondy baqylaýda ustaýǵa keńes berіledі. Úıden keterde esіktі qulyptap, kórshіlerden kóz qyryn salýdy suraý, beıtanys adamdardy úıge kіrgіzbeý de mańyzdy.
Urylar mereke kezіndegі qarbalasty sheber paıdalanady. Jaqynda Almatyda qylmyskerler bіreýdіń úıіnen seıftі alyp shyǵyp, kóshede arqalap júrgen. Tіptі qoǵamdyq kólіkpen alyp ketpek bolǵan sátіnde ustalǵan. Al Qaraǵandyda er adam ózі jumys іsteıtіn mekemeden quny 4,5 mıllıon teńge turatyn beınepaneldі bólshektep urlap, keıіn ınternet arqyly satpaq bolǵan. Qylmysker anyqtalyp, ustaldy.
Qysqasy, mereke kóńіldі ǵana emes, qaýіpsіz de bolýy kerek. Jańa jyl qarsańynda saqtyqty kúsheıtіp, alaıaqtar men urylardyń aılasyna túspeý árkіmnіń óz qolynda.
Avtory Serіk Aldan
Material avtory
