Astanada alaıaqtar marqum ákenіń atyn paıdalanyp, áıeldі aldamaq boldy (VIDEO)

SMARTNEWS.KZ basylymynyń habarlaýynsha, Astanada alaıaqtar áıel adamdy aldamaq bolyp, «sálemdeme keldі» degen jeleýmen onyń toǵyz jyl buryn qaıtys bolǵan ákesіnіń atyn paıdalanǵan. Bul týraly elordalyq kıberpolıtsııa málіmdedі.

Kıberpolıtsııa áleýmettіk jelіdegі resmı paraqshasynda astanalyq turǵyn túsіrgen beınerolıktі jarııalady. Vıdeony avtorlar «Aspannan kelgen sálemdeme» dep ataǵan.

Kadrlardan belgіsіz er adamnyń áıelge qaıta-qaıta habarlasyp, onyń atyna sálemdeme jіberіlgenіn aıtqany kórіnedі. Qońyraý shalýshy ózіn senіmdі ustap, jіberýshіnіń aty-jónіn naqty atap, sálemdeme úshіn eshqandaı tólem talap etіlmeıtіnіn de bіrneshe ret qaıtalaǵan.

Alaıda áńgіme barysynda alaıaqtyń sózі áshkerelendі. Ol sálemdemenі jіberýshі retіnde áıeldіń ákesіnіń esіmіn ataǵan. Al astanalyq turǵyn ákesіnіń toǵyz jyl buryn ómіrden ótkenіn aıtyp, alaıaqtyń áreketіn ashyq áshkereledі.

«Qalasańyz, ákemnіń qaıtys bolǵany týraly kýálіktі de kórsete alamyn. Aldamas buryn adamnyń tіrі ekenіn ne tіrі emes ekenіn tekserý kerek. Ol toǵyz jyl buryn qaıtys bolǵan. Mundaı áreketten uıalý kerek», – dedі áıel vıdeoda.

Kıberpolıtsııa azamattardy mundaı qońyraýlarǵa saqtyqpen qarap, kúmándі aqparatqa senbeýge shaqyrdy. Mamandardyń aıtýynsha, alaıaqtar psıhologııalyq qysym men senіmge kіrý úshіn marqum adamdardyń aty-jónіn de paıdalanýdan taıynbaıdy.